A Plataforma Ulloa Viva reclamou esta quinta feira á Xunta da Galiza paralizar a tramitación que está a levar a cabo do proxecto de Altri para instalar unha celulosa en Palas de Rei (A Ulloa). A entidade sinalou que a factoría resulta “incompatíbel” co cumprimento da Directiva Marco da Auga da Unión Europea e lembrou que esta mesma semana o Comisario Europeo de Medio Ambiente, Virginijus Sinkevicius, advertiu de que o estado do encoro de Portodemouros é “inferior a bo”.
O colectivo solicitou ao Estado “que non se concedan os fondos dos proxectos estratéxicos para a recuperación e transformación económica (Perte) a unha fábrica que causará un deterioro significativo e irreversíbel á auga do río Ulla e aos ecosistemas dependentes”.
Neste sentido, indican que o feito de que Bruxelas reclame que este proxecto ten que pasar pola avaliación do artigo 4.7 da Directiva Marco da Auga é que considera que vai causar un dano significativo á masa de auga e, polo tanto, non podería ser candidata ao Perte de descarbonización”. Neste punto, lembran que “xa se alertou en Bruxelas o pasado mes de abril de que o proxecto incumpre até sete directivas comunitarias”.
Dende a Plataforma indican que persoas expertas en materia de augas destacan que un dos aspectos máis relevantes na aplicación da Directiva Marco das Augas (DMA) en relación coa conservación da auga e dos ecosistemas acuáticos e ribeiregos asociados, céntranse no “principio de Non Deterioro”. Este principio, din, obriga as administracións responsábeis a recuperar o bo estado (nos ríos, lagos) ou potencial estado (nos encoros) nas masas de auga afectadas polo deterioro.
No comunicado, Ulloa Viva lembra que segundo a Directiva Marco das Augas aprobada no ano 2000 todas as masas de auga deberían estar en bo estado no 2015. "No caso do encoro de Portodemouros leva xa dúas prórrogas para acadar ese “potencial bo estado´”, e o 2027 é a data tope para cumprir coa normativa ou o Estado español será sancionado por Bruxelas e será a cidadanía a que pague a multa pola falta de acción das administracións e pola actividade nociva dunha macrocelulosa que pretende instalarse a toda costa neste espazo sen ter en conta os informes que alertan do seu estado”.
Premio Ríos Mortos
A Asociación Ríos con Vida, a máis veterana entidade do Estado en defensa dos ríos e da pesca sustentábel, entregará o seu Premio Ríos Mortos 2024 a Altri polo proxecto de megafábrica de pasta de papel que pretende instalar en Palas do Rei "cun evidente desprezo ao principio de precaución, á integridade da paisaxe, á dinámica natural e aos procesos ecolóxicos, á conectividade ecolóxica e ás funcións e servizos dos ecosistemas”.
A este respecto, considera que “hai poucas dúbidas de que esta industria lesionaría o interese público".