Os sindicatos alertan de que perigan máis de 300 empregos coa fusión de BBVA e Banco Sabadell

A comunicación oficial á Comisión Nacional do Mercado de Valores (CNMV) esta cuarta feira da proposta de fusión impulsada polo BBVA ao Banco Sabadell comeza a ter reaccións na bolsa e no eido sindical. Esta quinta feira as accións de Banco Sabadell disparáronse, liderando as subas do Ibex 35 cunhas ganancias de case 7,4%, impulsadas polo troco proposto para a fusión polo BBVA. Nel, cambiaríase 1 acción de nova emisión de BBVA por cada 4,83 accións de Banco Sabadell, o que supón unha prima de 30% sobre o prezo de feche de Sabadell e BBVA o pasado 29 de abril, o día antes de coñecerse esta potencial operación. A entidade indica, ademais, que implica unha prima de 42% respecto a as cotizacións medias ponderadas do último mes, e de 50% atendendo aos tres últimos meses. Pola súa parte, as accións do BBVA situábanse no lado das perdas, cunha caída de 1,08%, até os 10,065 euros por títulos. Aínda está na memoria o anterior intento de fusión que realizou o BBVA en novembro de 2020. Naquel momento fixo unha oferta de 2.500 millóns de euros que a entidade catalá rexeitou por considerar que o seu valor era moi superior, de máis de 12.000 millóns de euros. BBVA propón unha fusión por absorción de Banco Sabadell: estas son as claves da operación No caso de caso de confirmarse a fusión, o resultado sería a creación da segunda entidade bancaria da Galiza con 176 oficinas, só por tras de Abanca, que conta con 435. Segundo fontes sindicais, ao remate do primeiro trimestre de 2024, o Banco Sabadell -que dispón de marca propia no país coa denominación de Sabadell Gallego- ten unha rede de 57 oficinas e 372 persoas empregadas. O BBVA, pola súa parte, conta con 119 oficinas e 771 persoas empregadas. Destrución de emprego Segundo responsábeis de CIG de BBVA e de Sabadell, na Galiza, a central sindical nacionalista seguiría a ser a representación sindical maioritaria en caso de fusión. O secretario da sección sindical da CIG no BBVA, Miguel Fernández, explica a Nós Diario que a fusión sumaríase a unha serie de problemas que arrastran desde hai anos “pola modificación bancaria de diminución de servizos á clientela, de feche de oficinas e de destrución de traballo”. Este sindicalista entende que “este tipo de fusións están creadas para reducir a competencia e aforrar custos reducindo postos de traballo”. Achega os datos dun informe interno que realizaron en 2020, cando se propuxo a anterior fusión, que indicaban, daquela, a destrución de 417 postos de traballo por duplicidade no emprego e calculan que superaran os 300 se se leva adiante a actual. O ano da pandemia, o BBVA contaba na Galiza con 146 oficinas e un cadro de persoal de 867 persoas mentres que o Sabadell tiña 97 oficinas e un total de 448 traballadoras e traballadores. "Todo iso cos beneficios que continúan a ter e que anuncian 11cada trimestre", afirma Fernández, "e o prexuízo para a clientela da diminución de competencia", engade. Ademais do feche de oficinas e redución de persoal, desde a central sindical advirten de que "a entidade resultante pagará menos impostos, xerando cretos fiscais ao seu favor eludindo o futuro pago de impostas sobre os beneficios, ademais de reducir a súa contribución á Seguridade Social". BBVA e Banco Sabadell achegan posicións para unha inminente fusión Exclusión bancaria En declaracións a Nós Diario, o responsábel do sector financeiro e de servizos de CCOO, Jorge Villarino, considera que, ademais da destrución de emprego que se pode dar, "hai que pór enriba da mesa a exclusión financeira das vilas galegas e da súa poboación". Neste sentido, o último informe da Asociación Española de Banca (AEB), de outubro de 2023, indican que na Galiza hai 64.549 persoas que viven en 48 municipios nos que non existen oficinas bancarias. En relación ao emprego, Villarino asegura que "non se entendería unha redución de persoal cando agora mesmo no BBVA están a contratar xente e haberá xubilacións en breve por contar cunha media de idade moi alta entre o seu persoal". UXT pide negociar Desde as seccións sindicais de UXT en BBVA e Banco Sabadell lembran, a través dun comunicado “que fai catro anos xa vivimos esta mesma situación sen un desenlace” mais manteñen, como nese momento, que “o máis importante son as persoas traballadoras de ambas as entidades”. Envían a mensaxe “as partes que agora negocian esta posíbel fusión” que desde este sindicato “non admitiremos ningunha medida non negociada coa representación legal dos traballadores” e “en ningún caso, aceptaremos medidas forzosas, máxime nestes momentos nos que ambas as entidades presentaron uns beneficios récords para 2023 e o primeiro trimestre do 2024”. Rematan sinalando que velarán “por que a concentración bancaria derivada deste posible proceso de fusión cumpra a normativa vixente e non supoña un menoscabo no servizo ao cliente”. Banco Sabadell traslada a súa sede fóra de Catalunya, a Alacant Manteríase a marca BBVA con algunhas excepcións Segundo o documento entregado na CNMV, a entidade resultante da fusión tería unha das súas sedes operativas do Grupo en Catalunya, que se estabelecería no centro corporativo de Banco Sabadell no municipio de Sant Cugat. A denominación social e marca serían as de BBVA, "aínda que se podería manter a utilización da marca Banco Sabadell, de maneira conxunta con marca BBVA, naquelas rexións ou negocios nas que poida ter un interese comercial relevante", segundo detállase na carta. Este é o caso das oficinas que ten na Galiza que contan coa denominación de Sabadell Gallego. Na mesma carta, o BBVA enfoca a fusión en chave europea. Neste sentido, a entidade bancaria subliña que a combinación de ambas as dúas entidades daría lugar "ao proxecto industrial máis atractivo da banca europea”. O BBVA explica esta idea cos seus propios datos asegurando que a nova entidade resultante "converteríase nunha das maiores e máis sólidas entidades financeiras en Europa, con activos totais por encima do billón de euros e máis de 100 millóns de clientes a nivel mundial, coa ambición de ser o maior banco por capitalización bolsista da zona euro".