Descifrando o código

Segundo datos do Sergas, un 83,5% das persoas de entre 14 e 18 anos xogou a videoxogos durante o ano 2021. Algo que, por outra parte, non resulta sorprendente ao entender a variedade de produtos que abrangue o sector do videoxogo. Tanto é así que Iago Gordillo, impulsor de Recuncho Gamer, o espazo de divulgación dixital en galego sobre a industria do videoxogo, insiste en que "non é unha cousa tan de nicho", pois "hai moitos tipos de videoxogos e non todo o mundo xoga aos mesmos". Unha forma de comprender isto é introducirse na sección de entrevistas da súa canle de YouTube, na que figuras como a cantante Pili Pampín ou o actor Xosé Antonio Touriñán se achegan a botar unhas partidas. Desde esta canle pretenden enfocar o videoxogo "como produto cultural" e, para iso, procuran ir máis alá da súa parte lúdica, explicando tamén "as dinámicas, a parte artística...". De calquera forma, destaca que "calquera cousa pode levarse ao terreo do xogo, porque tamén é parte da cultura e da vida das persoas". Proba disto é que até é posíbel facer un especial por San Valentín falando sobre as dinámicas de 'ligoteo' nos videoxogos. A consola apareceu na vida de Iago con pouco máis de cinco anos e durante un tempo os videoxogos convertéronse "nun punto de encontro", unha escusa para que as amizades foran xogar á súa casa ou ir el á de alguén. Ve os videoxogos desde a emoción e interpreta o valor dunha boa historia como "algo que te move por dentro". Recoñece a existencia de xogos con personaxes hipersexualizadas ou con exceso de violencia, mais incide na posibilidade de "buscar outros xogos, con outras narrativas e con máis diversidade de historias e representación". A revolución verde: o vínculo entre veganismo e ecoloxismo Así mesmo, remarca a importancia de coñecer o que sucede nos xogos, tamén nas súas comunidades, como poden ser as dinámicas dos micropagos. Pois, como explica, ter ou non un determinado produto dentro do videoxogo achega status no grupo. Entende tamén a posibilidade de compartir os videoxogos en familia, destacando o caso de Madialevo, ao que ten xogado en directo co seu fillo. Así, precisa Iago, "é posíbel empregar os videoxogos para ensinar xeografía ou arte", podendo servir tamén como ferramenta para "axudar a mellorar a resolución de problemas ou traballar a frustración". Con selo galego Lucas Costas, parte do equipo do Museo do Videoxogo, ve complicado "precisar cando se pode comezar a falar do videoxogo galego", malia que identifica os anos 90 como unha data clave. Aínda así, incide en que "seguramente habería algún desenvolvemento nos microordenadores durante os 80", se ben de momento non é algo que se poida concluír con seguridade. Sobre a situación galega, Lucas ten moi presente o tipo de grupos que impulsan a industria, moitos "con pequenos orzamentos". Un deses equipos humildes é Gamespond, impulsor do videoxogo Avy, fábulas da noite, xogo creado no Máster de Desenvolvemento de Videoxogos da Universidade da Coruña, no campus de Ferrol. Lucas argumenta que o impulso destas formacións facilitou que, "sobre todo nos últimos cinco anos, se producise unha aceleración no número de proxectos". Sobre o propio consumo, Alicia Puentes, de Gamespond, opina que aínda que "non está ben vivir por e para os videoxogos", poden servir para o desenvolvemento psicomotriz e mesmo modificar a forma de entender os movementos. Asegura que "o videoxogo non deixa de ser unha arte e achega tanto como unha boa película ou unha boa historia, porque todo iso forma parte dos videoxogos e permite desenvolver a creatividade". Máis alá do sexo: un achegamento ás primeiras veces, a masturbación e o desexo Con todo, Alicia destaca os diferentes departamentos que se precisan para a posta en marcha dun videoxogo. Desde a produción até a mercadotecnia, pasando polo deseño de arte, son moitas as cuestións a ter en conta, como pode ser a planificación, a xestión de recursos, o guión, o deseño de personaxes, cales van ser as mecánicas... Moito traballo para que poida ver a luz un videoxogo que, no seu caso, conseguiu gañar o premio de Playstation á mellor arte e que segue os pesadelos da súa protagonista a través de "crebacabezas, batallas dialécticas e humor". Mais a oferta dos videoxogos creados na Galiza, en galego ou con escenario ambientados no país non queda aí, con exemplos coma Super Woden gp 2 ou Eurotracksimulator 2, coa súa expansión Iberia, para seguir xogando cos pés na terra. Ideando os videoxogos dun novo tempo O Museo de Videoxogos de Cangas naceu no ano 2019 como o primeiro museo do Estado español dedicado a esta disciplina. Así, entenden que "hai moita demanda de falar sobre os efectos do videoxogo, os seus usos saudábeis, os problemáticos…", destacando a súa relación cos centros de ensino e remarcando a existencia de "videoxogos que abarcan todo tipo de temáticas e intereses e para todos os públicos". Sobre o futuro do sector, e en relación á intelixencia artificial, Lucas ve "pouca claridade", mais pouco a pouco vaise definido o seu papel "e os posíbeis usos que se lle queren dar desde a sociedade". En canto á realidade virtual, o museo conta tamén cun equipo para que "as visitantes poidan coñecer esta tecnoloxía".