Penedos de Pasarela e Traba

Na Costa da Morte, entre os concellos de Vimianzo e Laxe, atópase a serra de Pena Forcada, un agrupamento de pequenas alturas que se estende, con dirección leste-oeste, paralela á costa. Toda ela presenta os cumes desgastados, coroados por rochas graníticas moi fracturadas e erosionadas. Desta aliñación fai parte o macizo de Pasarela e Traba, un espazo no que a xeoloxía e o paso do tempo crearon numerosas formas –algunhas apreciacións citan máis de 50– que pola súa disposición, o seu tamaño e/ou as súas aparencias, resultan curiosas ou singulares. Razón pola que, grazas ao esforzo da veciñanza, está protexido, desde o ano 2008, baixo a figura de Paisaxe Protexida Penedos de Pasarela e Traba. A zona é un bo lugar para unha camiñada non moi longa, pero na que se poden botar máis horas das que se pensa se nos demoramos tentando achegarnos a todas as rochas e/ou miralas desde varios puntos para descubrir as súas formas (un empeño que tamén se verá dificultado polos toxos), mais ao longo do percorrido podemos gozar tamén das paisaxes da contorna. Podemos achegarnos ao lugar desde Vimianzo (Terra de Soneira), ou desde Laxe (Bergantiños). Desde Vimianzo polo Sixto (Calo) para, despois de pasar o río Grande, chegar a Pasarela. Desde aquí podemos facer un percorrido circular que comezamos ao pé da pista deportiva para irmos cara ao lugar do Penedo. Pasado o lugar seguimos o camiño, que marca a linde do espazo protexido, e sen deixalo chegamos até a proximidade da canteira onde se atopa o primeiro grupo de rochas de interese, entre as que destaca a Cachucha, que coroa a contorna, o Barco, a Balea, unha rocha multiforme que segundo de onde se mire é unha man, unha nave espacial ou un asento real... De volta no camiño seguimos até o cruzamento onde imos á esquerda até atopar un pouco adiante outro desvío á esquerda que nos sitúa entre a Galla, o segundo punto de interese, onde ademais dela podemos atopar o Moai, o Bico... e a Torre da Moa, o terceiro, onde podemos ver a Torre, o Ceñudo, a Pomba,... e temos unha fermosa panorámica. Despois de visitar as zonas seguimos baixando para saírmos á estrada onde imos á esquerda e uns 400 metros adiante temos á esquerda un desvío asfaltado que nos permite ver algunhas formas que se atopan na zona e que nos leva a Pasarela, onde completamos o percorrido, uns 6,5 quilómetros máis os 4 ou 5 dos desvíos. Para ir desde Laxe imos a Traba e desde o lugar da Costa collemos, á esquerda da estrada, un desvío sinalizado á Torre da Moa, que por unha estradiña asfaltada nos permite chegar até moi perto da Torre da Moa e das Gallas. Desde aquí o percorrido é máis curto, uns 3 km (ida e volta) máis os desvíos.