Polos cumes do Suído I (norte)

Volvemos ao Suído. Pasaron meses desde aquel comezo do outono a hoxe, mediado o inverno, un día de sol, algo frío e cun ventiño, a refachos, suave. A paisaxe propia da estación, coa vexetación en suspenso, algunha pequena mancha de neve nos altos -ao abrigo de noiros sombrizos e ao acubillo das croas de árbores- e o silencio -o único son que se escoita é o dos nosos pasos e, ao lonxe, algún ruído mecánico-. Comezamos na capela de San Domingos e imos ao oeste, cara ao alto da Pena da Hedra, no outro lado da capela atópase O Pico do Monte Chao. Destes montes baixan, cara ao norte, as augas que forman regatos que flúen cara ao Lérez. Desde a Pena da Hedra imos cara ao sur, levando á dereita o val do primeiro río Verdugo e a serra do Cando. Imos perdendo altura para rematar na estrada un pouco antes da Portela da Cruz. Na Portela da Cruz conflúen varias estradas que cruzan a serra. No cruce seguimos de fronte pola estradiña que ten o sinal dun avión, que discorre ao pé da pista de aterraxe, e permite camiñar polo planalto do lombo da serra preto da liña dos cumes, desde ela faremos uns desvíos aos que máis sobresaen -un deles coroado por unha vella caseta de vixilancia-, logo seguimos achegándonos ao cume que coroan unhas vellas antenas de telefonía e cando nos atopamos xa preto del, sae de fronte, pola dereita da estrada, un camiño de terra polo que continuamos. Un quilómetro adiante atopamos un desvío á esquerda para subir ao pé das antenas desde onde se dominan as panorámicas da contorna. Volvemos ao camiño para seguir cara ao noso obxectivo, un pouco adiante pasamos a condución soterrada do gas, e comezamos a gañar altura por unha pendente tendida até chegarmos a unha cancela que pecha o camiño, que se atopa no límite entre as provincias de Ourense e Pontevedra. Aquí, seguindo a devasa que vai polo límite provincial, que sobe ao pé do peche, imos sen perda ao cume do Puza, o noso punto de destino. Se seguimos pola pista, pasamos sen velo, porque o tapan os que están máis preto. Como a camiñada é longa e o tramo asfaltado sen moito interese, podemos comezar a ruta na Portela da Cruz, facer unha primeira camiñada cara á pena da Hedra e a contorna da ermida de San Domingos e volver, logo facer no coche o tramo asfaltado, parando para facer os desvíos, co que aforramos camiñar case 10 km, e completar a pé o camiño ata o Puza. Volver ao coche e baixar nel pola Hedreira cara a Amiudal porque desde o traxecto ademais de ter unhas fermosas panorámicas da contorna poderemos apreciar a altura e a forte pendente das abas da cara leste da serra polas que caen, en fervenzas, varios regos que van ao Avia.