Compostela arroupará a homenaxe galega ao Zeca

“Terra da fraternidade” anúnciase como un dos máis relevantes encontros musicais da temporada, evocando ao cantor que estreara o seu Grândola en Compostela, pouco antes de se converter nun dos máis coreados himnos revolucionarios. O espectáculo do día 10 de maio prevese multitudinario, unha vez que as entradas que se reservan para a venda anticipada están xa esgotadas.

João Afonso, o sobriño do Zeca, abrirá unha noite en que se darán cita algúns dos principais nomes da música e teatro galegos, no mesmo espazo da cidade en que o cantor portugués estreou o máis coñecido dos seus temas. Uxía, Najla Shami, Aline Frazao, Xoan Curial, Agência de Viagens, Xabier Díez e Guille Fernández, Narf e o grupo formado por Xico de Cariño, Humberto Heredia e Manolo Bacallau, abrirán o espectáculo coa presentación de Carlos Blanco.

Sés e Bocixa, Xurxo Souto e Ico, Leo e García, ou Adrián Beiroa e Vituco participarán na segunda parte, división que se verá reforzada pola proxección en tres partes do documental arredor da vida e da figura do Zeca. Quico Cadaval será o encargado de facer a despedida e dous temas presidirán esta homenaxe multitudinaria galega, por unha parte a agardada Grândola e pola outra, Filhos da madrugada, a canción que titulou o traballo no que os novos grupos musicais portugueses se recoñeceron en José Afonso e que agora evidencia tamén a herdanza manifesta na música galega.