Aventuras no Oeste para xente miúda (e non só)

Ter crianzas proporciona acceso a un mundo ilimitado de entretemento infantil, ao cal non se adoita acceder se non se teñen. Ao principio hai un proceso de negación e acostuma paparse moita trangallada, pero se se é paciente e se asume o destino, pódese acabar descubrindo, como no meu caso, auténticas marabillas para a cativada que tamén nos entreteñen ás persoas adultas: series de debuxos animados como Bluey, programas de televisión como Digochiño, bandas como Uxía Lambona e a banda molona e, claro, tamén moitas películas. Buffalo Kids é o meu último gran descubrimento. Está codirixida por Pedro Solís, autor da curtametraxe de animación Cordas, de 2013, inspirada na tenra relación fraternal e de amizade sen prexuízos que mantiña a súa filla Alejandra co seu fillo Nicolás, tetrapléxico e ancorado nunha cadeira de rodas; curta que levou tantos premios (máis de 240) que acabou entrando no Libro Guinness dos Records. Solís traslada o mesmo concepto da curta pero introdúceo nunha historia de aventuras, guionizada por Jordi Gassull e o ourensán Javier Barreira, que transcorre no Oeste norteamericano na época dos indios e vaqueiros. Mary e Tom chegan a Nova York o 28 de outubro de 1886 para ser acollidos polo seu tío emigrado nos EUA. Como non aparece, deciden ir na súa procura á dirección onde se supón que vive; pero resulta estar ao outro lado do país, polo que se colan nun tren como polisóns grazas un grupo de nenos e nenas dun orfanato. Entre eles está Nick, un rapaz en cadeira de rodas que apenas pode moverse. Pero a viaxe será interrompida por un tipo cuspidiño a Lee Van Cleef. Ademais do aspecto escollido a mantenta para o "Malo", tamén hai chiscadelas cinéfilas a filmes como Taxi Driver ou Aterra como poidas, pero, sobre todo, hai moitos paralelismos con Indiana Jones, concretamente á peli do Templo Maldito, con homenaxes, case reverenciais, tanto na persecución dos vagóns como na subtrama dos nenos escravos e tamén na escena das chaves (cuspidiña á do antídoto no Clube Obi Wan). Buffalo Kids proporciona unha emotiva aventura infantil ben equilibrada para goce tanto da xente miúda como de acompañantes. A rapazada implicarase coas aventuras de Tom, Nick e Mary, esmendrellarase coas escenas de peidos (que parecen gratuítas, pero non) e quedará cravada á butaca na persecución dos chacais. O público adulto é mellor que vaia preparado con panos (de tea ou papel), porque a bágoa incipiente está asegurada. No Guinness non entrará, pero seguro que se fai co Goya, como mínimo.