Claudia Quintela, DJ Misa: "Hai unha explosión da música en galego e o que pincho faise agora máis recoñecíbel"

Sendo este o segundo ano que toca no Festigal, como encarou o traballo de cara á actuación deste ano? Coa ilusión de sempre, a verdade. O ano pasado foi unha experiencia moi bonita, desfruteino moito, e ademais coido que o público tamén o estaba vivindo de maneira similar. Xa tiña ganas de repetir, tamén porque os últimos bolos que estou tendo nesta tempada están indo moi ben. Espero que sigan sendo así. Estou moi agradecida á organización do Festigal porque quixeran contar comigo e co meu proxecto un ano máis e espero que o que fago tamén sexa agradábel para o público e que así poidamos volver vernos moitas máis veces. Despois de tres anos desenvolvéndose nesta profesión, como ve o mundo DJ desde dentro? Ás veces é bastante complicado porque tes que buscarte a vida. Ademais, cando te contratan nun sitio tes que estar moi pendente de que se cumpra o que pediches, de que as condicións de traballo sexan axeitadas ao que precisas. Nese sentido si que creo que se respecta máis a outro tipo de artistas dentro da música que aos DJs. Creo que moita xente pensa que son "a rapaza esa que vén darlle ao botón de reproducir", cando hai moitas horas de traballo detrás. Horas de preparación, de buscar novos temas e demais. Imaxino que as persoas que xa son moi coñecidas non teñen problemas deste tipo, mais tamén depende moito de se dependes de ti ou se contas cunha empresa detrás que te represente. Ao final, se te autoxestionas ti, vas ter que estar enriba de todo igual, polo que as dificultades son bastante similares ás que podo ter eu, por exemplo. Empecei a pinchar hai aproximadamente tres anos grazas a un curso que fixen en WAX!, unha escola en Santiago. De aí chamáronme un día para unha actividade que facía a rapazada da escola O Raio Verde, tamén en Santiago, e xa me encantou. E de aí até agora. Cales son os próximos pasos que quere dar no que respecta ao futuro do seu proxecto ou cara a onde cre que pode ir evolucionando? Agora mesmo estou traballando en algo. Estamos en fase de preprodución dun vídeo dun DJ set, ao estilo Boiler Room. En principio a idea é comezar a gravar nestes meses. Ademais vouno facer con algunhas amigas e teño moitas ganas de traballar nisto. Tampouco ten nada que ver o estilo de música que pinchaba cando comecei a aprender co que fago agora. Fun evolucionando como artista, mais tamén o público e nos últimos anos houbo unha explosión no que respecta á música en galego. Todo isto foi o que me guiou cara o camiño no que estou agora. Antes quizais estaba máis limitada á hora de pinchar en galego, que xa era o meu obxectivo, porque había menos variedade. Agora o traballo é moito máis agradecido e a música que pincho faise máis recoñecíbel. Percibe tamén unha mellor acollida en certos espazos por pinchar música en galego? Diría que si, que en certos lugares é máis doado entrar cando o que pinchas principalmente é música na nosa lingua. Tamén é certo que me gustan máis cousas e que intento ter certa capacidade de adaptación segundo o espazo no que vaia estar tocando. Con todo, é evidente que se a miña base é tocar esta música, tamén é máis doado que me chamen desde algúns espazos concretos.