Un espectáculo de 'trad' con banda de música
Estamos a vivir un momento doce na música tradicional, con iniciativas e novos formatos que xorden coma cogumelos. A última novidade chega da man do gaiteiro Suso Vaamonde, que presenta o sábado un espectáculo coa Banda de Música de Salceda de Caselas.
A estrea de “De tradición con Suso Vaamonde” será en Gondomar, na praza da Coelleira, o sábado 6 dea gosto ás 22 horas. Trátase, segundo o protagonista, “dunha simbiose entre a Banda Cultural de Música de Salceda de Caselas e máis eu como solista invitado. O programa compóñeno temas populares e tradicionais galegos interpretados con banda de música e instrumentos populares galegos, que eu interpretarei. Estes van desde a gaita, zanfona e o acordeón, pero tamén asubío, tarrañolas, pandeiretas, birimbao, carrizo, castañeta…”
Todo isto, adubiado con moito humor, que é unha traza básica na carreira musical deste gaiteiro. “Pretendemos que sexa lúdico, con guiños de humor, musicais e extramusicais. Tamén será didáctico, un xeito divertido de facer un percorrido pola historia da música tradicional galega”, explica. “E a Banda vai cantar dous temas, un alalá e unha muiñeira, con parella de baile, e foliada, ademais de representar temas do coro de Perfecto Feijoo”, o pontevedrés que creou no século XIX o primeiro coro con voces e instrumentos tradicionais galegos.
Pretendemos que sexa lúdico, con guiños de humor, musicais e extramusicais. Tamén será didáctico, un xeito divertido de facer un percorrido pola historia da música tradicional galega.
O espectáculo pretende “facer un repaso de temas populares galegos sobre uns poucos instrumentos da tradición popular galega combinados con banda de música”. Incluirá temas populares e tamén de autor, pero xa asentados no acervo popular, e tamén temas novos compostos por Xoán Porto. Todos eles arranxados para banda, gaita e percusión por Juan Lois Diéguez, director da banda.
Todo xurdiu dunha experiencia anterior cun espectáculo de trío máis banda coa mesma formación de Salceda con outro dos proxectos do gaiteiro, Vaamonde, Lamas & Romero. O músico tamén é o 50% do dúo Cantata Vernácula xunto con Xoán Porto, que mestura humor e música tradicional.
Esta primeira presentación será gravada e, posteriormente, agardan ofrecer máis concertos por todo o país.