Hugo Guezeta, rapeiro: "Quería manter a carga combativa dos meus temas, pero cun punto de vista máis alegre"

—Xa leva publicados dous adiantos do novo disco. Como está encarando este proxecto? Vai con calma. As gravacións comezaron en setembro do ano pasado, mais xa era a miña idea, cando comecei a traballar neste disco, que fose un proceso longo e calmado. Ten temas alegres, mais tamén tristes, con diferentes ritmos e estilos moi diversos en cada unha das cancións. Pode verse perfectamente a diferenza entre "O noso tempo" e "Feridas", xa que unha tira máis cara ao electrónico e o outro cara á salsa. O noso tempo foi das primeiras letras que creei do disco novo. Para min supuxo rematar o ciclo con Son da Rúa e comezar unha nova etapa. Ten a carga combativa que hai sempre nos meus temas, mais desde un punto de vista máis alegre e motivador. Cando gravamos o videoclip, a idea era montar festa entre amigas e amigos, polo que tamén foi moi divertido. No caso de "Feridas" é outra cousa totalmente distinta. É un tema que fala das nosas preocupacións internas, amores e desamores... É reflectir o que as xeracións máis novas vivimos á hora de enfrontarnos á vida e a este sistema. Despois de crear a letra, quixemos darlle o toque de salsa ou de bolero, a pesar de que ten un ritmo de rap. —Cales son as dificultades que ve á hora de crear estes temas mantendo o seu estilo propio e afastándose á vez do que facía antes? É certo que cando comecei custoume bastante. Tiven un pequeno bloqueo creativo porque para min era difícil cambiar o chip. Non é o mesmo compor en grupo e para Son da Rúa que para min mesmo. Este é un disco máis intimista, que tamén era algo que xa estaba presente no que saquei en 2022. Axudoume bastante o feito de querer darlle diferentes estilos aos 14 temas que van estar presentes. Con Petrowski, está sendo un traballo moi enriquecedor por ambas as partes porque antes, con Son da Rúa, cando íamos ao estudo xa tiñamos o tema practicamente listo para gravar. Neste caso, teño ido a xunto del con temas sen rematar, melodías a medias e cousas así. O noso proceso de traballo pode ser de varias maneiras. Ás veces, envíolle un anaco de letra sobre unha instrumental que atopo por aí, el fai unha instrumental cun estilo rítmico similar, mais facéndoa totalmente súa, e de aí tiramos. Outras veces, el envíame unha batería de instrumentais que xa ten creadas e despois é cando eu poño a letra. Desfrutamos moito creando xuntos e el achégalle moito valor ao proxecto, tanto instrumental como incluso vocal cando preciso algún ton intermedio. Ao final, os meus coñecementos de canto son autodidactas e el axúdame moito a crear novas melodías e ritmos. —Hai xa unha data de lanzamento para este disco? Nestes momentos, só faltan catro temas por gravar, polo que xa estamos ante o último empuxón que precisa o traballo. Aínda non podemos concretar unha data, mais si que podo dicir que sairá a finais de ano, probabelmente en novembro. De feito, xa temos algunhas datas confirmadas en decembro para presentalo: o día 14 na sala Rebullón (Mos), o 19 na Mardi Gras (A Coruña) e o 21 na Sónar (Santiago). En principio, van ser as únicas presentacións que faremos este ano, mais xa estamos comezando a ver como organizamos 2025 tamén.