Concertos ao vivo, danza, cinema... 'De Lugares e Órganos' converte Compostela en crisol das músicas europeas

En 1987, o Consello de Europa cualificou a rede de camiños de Santiago como "primeiro itinerario cultural europeo", dándolle así carta de natureza a Compostela como centro de referencia do panorama artístico e cultural: a cidade funcionou como unha ponte de intercambio de culturas desde que o bispo Diego Xelmírez reafirmara o poder do Reino da Galiza, no século XII. A novena edición do ciclo De Lugares e Órganos -que se desenvolverá do 24 ao 31 de marzo- semella facerse eco desa herdanza cosmopolita presentando un programa no que se poden atopar tendencias de varias latitudes e períodos históricos. A nova edición do ciclo, foi presentada esta cuarta feira en Compostela, pola concelleira de Acción Cultural, Míriam Louzao, e a directora artística do ciclo, Belén Bermejo. Logo de destacar e agradecer as colaboracións que se concentran no ciclo, Louzao salientou "a coidada harmonía de diferentes disciplinas artísticas, o xogo cos espazos e o rigoroso estudo tradición como punto de partida para a construción dunha proposta plenamente actual". Bermejo apuntou que, ao longo das súas nove edicións, De Lugares e Órganos soubo "moverse entre diferentes fronteiras, que van desde a música académica á experimental, coas novas músicas, a danza, o jazz, o cinema ou a arte sonora". Coa articulación deste programa a cabalo entre disciplinas, continuou Bermejo, o ciclo conseguiu "espertar o interese da cidadanía por esa parte do patrimonio histórico tan descoñecida e pouco investigada, maltratada pola historia, as guerras, as crises económicas e o desleixo" co obxectivo de "aprender a coidalo e transmitilo ás xeracións futuras". Un novo achado descobre un organista e compositor barroco inédito até a data Músicas ibéricas e europeas O organista de Mugardos Carlos Fernández Bollo será o encargado de ofrecer o concerto inaugural -o domingo 24 ás 20.30 horas, na igrexa de San Paio de Antealtares- cun repertorio integrado por música ibérica e europea do Século de Ouro e do primeiro Barroco. Fernández Bollo é un novísimo organista estabelecido en Groningen, nos Países Baixos, onde cursa os seus estudos de mestrado en órgano no conservatorio Prins Claus, da Universidade de Hanze. Malia a súa mocidade, vén de gañar o primeiro premio do V Concurso Nacional de Órgano Francisco Salinas, e recibiu tamén, no mesmo concurso, o Premio Montserrat Torrent. Portugal estará presente no festival grazas ao conxunto Ars Lusitana que, dirixido pola cantante e arpista Maria Bayley, dedica o seu traballo a investigar e recuperar o patrimonio musical portugués, coa obxectivo de recuperar músicas pouco coñecidas ou que caeron no esquecemento, a partir de fontes musicais aínda por explorar. O concerto que ofrecerán o día 25, ás 20 horas, na igrexa de Santa Clara centrarase na música renacentista procedente de conventos femininos, en particular na misa O gram senhora, recollida nun manuscrito conservado no Museo de Arte Sacra de Arouca. O programa propón, ademais, a reconstrución dunha práctica perdida, a interpretación dunha misa a catro voces, na que as tres partes superiores son cantadas e a parte inferior é tocada polo baixón, instrumento antecedente do fagot. A música galega do Renacemento e o Barroco, unha xoia por descubrir A República Serenísima No século XVI, Venecia converteuse nun importante centro de edición de música, o que atraeu compositores de toda Europa que querían beneficiarse da daquela nova tecnoloxía. Esta circunstancia, unida á decadencia de Roma como centro musical e as peculiares características da Basílica de San Marcos -con dous órganos enfrontados nun espazo amplo- levaron ao desenvolvemento da chamada Escola de Venecia, un movemento que tivo o seu máximo esplendor entre a segunda metade do século XVI e o primeiro terzo do XVII . O violinista Adrián Linares, membro destacado da Orquestra Sinfónica da Galiza, e Juan de la Rubia, un dos máis sólidos organistas do panorama peninsular e europeo interpretarán -o día 27 de marzo, ás 20 horas, na Capela de Ánimas- un repertorio ligado a esta escola, que marcaría a transición entre o Renacemento e o Barroco, con obras de, entre outros, Dario Castello, Claudio Merulo ou Girolamo Frescobaldi. A orixinal proposta da música, coreógrafa e bailarina, especializada en danza histórica, Eva Narejos, en colaboración coa organista Ana Aguado, consiste en achegar o público á figura de Santa Teresa de Xesús facendo un percorrido por diferentes episodios da súa vida a través dun traballo coreográfico que parte da reconstrución de danzas do Século de Ouro a partir de fontes orixinais recollidas en documentos da escola ibérica de danza. Será na sexta feira, 29 de marzo, ás 20 horas, na igrexa da Universidade. Acento inglés O concerto de clausura da edición deste ano de De Lugares e Órganos terá acento inglés. A organista compostelá Marta López e a violagambista vienesa Maria Viktoria Danneberg invitan en Breaking Notes -o concerto que ofrecerán na igrexa da Universidade o domingo 31, ás 20 horas- a mergullarse no mundo das divisions, grounds e danzas inglesas, combinando o colorido son da viola de gamba coas ricas posibilidades sonoras do órgano para recrear un repertorio extraído de dúas coleccións, o Fitzwilliam Virginal Book, de finais da época isabelina, e o Manchester Gamba Book, o maior manuscrito existente de música para viola do século XVII. Unha serie documental explora o mundo do órgano na Galiza Roteiros, cine e fotos para celebrar a riqueza organística compostelá Ademais dos concertos, De Lugares e Órganos organiza, o 27 de maio ás 10.30 horas, un itinerario por diferentes lugares da cidade relacionados coa figura do compositor Bartolomé de Olagüe, quen, a raíz das últimas investigacións musicolóxicas, engadiuse a nómina de compositores galegos. Sabemos agora que era orixinario de Santiago de Compostela e que, moi novo, profesou como monxe organista no mosteiro de Santa María de Sobrado, no que pasará corenta anos da súa vida. Trátase dun músico, organista, do que ademais se conserva obra escrita, cousa pouco habitual na altura. O roteiro rematará cun pequeno concerto, a cargo do organista e investigador Marco Aurélio Brescia, no que se interpretarán obras de Olagüe recollidas no coñecido como Libro de Cyfra de Porto, no órgano de San Miguel dos Agros. Por outra parte, De Lugares e Órganos repite a súa cita co cinema na sala Númax onde, -o 26 de marzo, ás 19.30 horas- se proxectará o filme Organ, dirixida por &Scaron;tefan Uher en 1965. Ambientado na Segunda Guerra Mundial durante a creación de Eslovaquia e a ocupación alemá, narra a historia dun mozo polaco, talentoso organista e desertor, que atopa refuxio ao escapar dos fascistas nun mosteiro franciscano. Recuperar e visibilizar o pasado musical da cidade é o obxectivo da exposición fotográfica arredor dos órganos de Compostela que poderá ser contemplada, durante todo o período de programación, en escaparates de diferentes establecementos comerciais da cidade.