CRÍTICA DE ROCK E OUTRAS LERIAS

Municipal Waste: Slime and punishment

ISIDRO RAJO

14 de xullo de 2017 (13:25 h.)

Non nos tiñan os Municipal Waste afeitos a unha espera tan longa entre traballos. Nada menos que 5 anos dende que editaran aquel plástico bastante frouxo nomeado The Fatal Feast até este Slime and Punishment. Moi atinado fora o título do seu traballo anterior, xa que o disco foi unha auténtica fatalidade para unha banda que non deixara de medrar meteoricamente dende o seu debut en 2001.

É cousa rara no panorama musical que unha banda prolífica dea un parón tras un mal disco. Moitos pensaron que era o fin da banda, xa que non era algo habitual neles e, ademais, Land Phil e Tony Foresta estaban moi activos co seu proxecto Iron Reagan, co que non deixaron de xirar e gravar dende 2012 e cuxo último álbum até a data, Crossover Ministry, foi editado en febreiro deste ano. Se a iso xuntamos os poucos directos da banda malia ter a sorte de os ver o ano pasado no Resu, as cousas non pintaban ben. Mais os temores era infundados e o 23 de xuño viu a luz Slime and Punishment, o moi agardado traballo de Municipal Waste

Nesta nova entrega, deixan atrás experimentos e innovacións e volven facer o que saben, un crossover neoiorquino seguindo o camiño que marcaran Suicidal Tendences, pero con máis peso do trash que do hardcore nas composicións acelerado e potente, capaz de executar 14 temas en pouco máis de 28 minutos. O que si que é novidade neste traballo é a incorporación dun segundo guitarrista, Nick Poulos, que achega momentos de frescura harmónica, aínda que non tantos como se podería agardar.

Outro punto a favor que ten Slime and Punishment¸ é o seu excelente son. A impoluta produción sen perder un ápice de forza demostra, máis unha vez, que potencia e calidade non son incompatíbeis, o que xa se aprecia dende Breathe Grease, o tema de apertura que vai directo ao fígado. Destacan gratamente os riffs e solos de Under The Waste Command, un tema puramente instrumental que rompe un pouco a tónica de continuidade do LP, ben como a intensidade de Excesive Celebration ou o single Amateur Sketch, que mostra a banda no seu estilo máis puro.

Municipal Waste están de volta cun novo disco cheo de crossover trash da vella escola, que se nota que está feito para o gusto dos seus fans. Non hai nada novo nin innovador, nin tampouco se lles pide, só bos temas e bo son para este regreso duns dos imprescindíbeis. Agora xa podemos seguir coa festa.

MUNICIPAL WASTE NAS REDES

WEB: https://www.municipalwaste.net

FACEBOOK: https://www.facebook.com/Municipalwaste/

TWITTER: @municipalwaste

LISTAXE DE TEMAS

1. Breathe Grease

2. Enjoy The Night

3. Dingy Situations

4. Shrednecks

5. Poison The Preacher

6. Bourbon Discipline

7. Parole Violators