Nos quioscos, até a segunda feira, o Sermos Galiza especial sobre Gurriarán
A edición desta semana de Sermos Galiza explora a vocación poética e política de Florencio Delgado Gurriarán.
O especial de 40 páxinas, que poderá mercarse nos quioscos desde este sábado e até a segunda feira, recolle distintas visións sobre unha personalidade caracterizada polo compromiso, ben desde a acción cívica e política, ben desde a actividade literaria.
Neste número do semanario, Miro Villar resume a contribución de Gurriarán a través de Saudade e de Vieiros, un exemplo da afervoada defensa da lingua e do ideario galeguista que sempre mantivo o poeta ao longo da súa vida.
Por outra parte, o crítico e historiador da literatura Xosé Ramón Pena afonda nalgúns aspectos da poesía mexicana do autor. Débora Álvarez Moldes reconstrúe os vínculos da poesía de Gurriarán coa súa terra natal de Valdeorras, e a xornalista Cristina de la Torre dará a súa visión sobre a recuperación contemporánea da figura do autor homenaxeado este ano, mentres que Montse González conversa co cantautor Anxo Rei, o primeiro divulgador da súa poesía.
Finalmente, Manuel Xestoso entrevista a Ricardo Gurriarán, parente e principal biógrafo de Florencio Delgado Gurriarán, para dar unha visión de conxunto da vida do autor.
Poderás mercalo nos quioscos e puntos de venda habituais e na loxa. Se non es subscritora ou subscritor, non dubides en adherirte.