Son demasiado "altos" os cachés das artistas musicais na Galiza?

O sector da música contará este mesmo mes cun completo estudo sobre a súa situación. Anunciouno o pasado 2 de decembro a Asociación Galega de Empresas Musicais (AGEM) na 16ª edición de Culturgal que decorreu en Pontevedra. O traballo, titulado Diagnose da industria musical na Galiza, partirá dunha investigación que iniciaron no grupo de investigación Posmark da Universidade de Santiago de Compostela (USC) a partir dunha enquisa realizada dentro e fóra do país. A presidenta de AGEM, Patricia Hermida Lago, adiantou a Nós Diario que un primeiro dato que atoparon de inicio é o aumento dos cachés de artistas e formacións musicais. Radiografía do sector A responsábel desta entidade afirma que decidiron promover e levar adiante esta iniciativa cando se decataron de que “non había nada semellante realizado até agora, coa excepción dun informe feito en 2007 por outra entidade e o que fixo o Consello da Cultura Galega en 2014". Neste sentido, apunta que cando teñen que sentar coas institucións atópanse con que “non temos cifras coas que falar de aumentar orzamentos ou de redireccionalos cara a outras liñas de actuación”. Coa intención de facer partícipes a todas as partes que forman a cadea do mundo da música, AGEM contactou con outras entidades, desde Músicas ao vivo até Clubtura, pasando por entidades que reúnen as orquestras e a Asociación de Empresas Tecnolóxicas e Servizos Audiovisuais da Galiza (Agatec). Ademais, puxéronse en contacto con organizacións situadas fóra do país, como a Sociedad de Intérpretes, artistas y ejecutantes (AIE) ou a Sociedad General de Autores y Editores (SGAE), “cunha aspiración máis aperturista, para saber da situación dos seus asociados e asociadas na Galiza”. A idea, segundo Hermida, é “contemplar aspectos que xa se trataron noutros organismos”. Da mesma maneira, obtiveron información da Asociación Europea de Salas e Festivais (LIVE DMA) para constatar se a visión que teñen do panorama galego é a mesma que teñen noutros países. A maiores, estudarán a situación laboral nos diferentes eidos, tendo en conta desde as empresas até o persoal autónomo que participa da industria musical. “Queremos sacar conclusións cando non se fan ben as cousas”, sinala Hermida. Samudra Trío: "Hai moitos prexuízos dentro da industria musical á hora de dar oportunidades á clásica" Incremento de cachés Á espera doutros datos e de analizar o estudo para extraer conclusións, Hermida pon de manifesto que o aumento dos cachés está a causar "moitos problemas" ao sector da industria musical. “Non é algo que aconteza só aquí, tamén a nivel mundial: o incremento do que cobran artistas e bandas dificulta o fechamento das programacións e dos festivais”, asegura. Neste sentido, a presidenta da Asociación Galega de Empresas Musicais adianta que “moitas complicacións que temos son comúns en todo o mundo”. Outro dos temas que sairán na investigación será a dificultade para acceder ás liñas de financiamento. "As subvencións públicas non atenden todas as realidades da cadea de valor", salienta Hermida, "algo no que estamos traballando desde AGEM", engade. Por outra parte, a investigadora e membro do grupo de investigación Posmark da USC, a profesora de Economía María Bastida Domínguez considera, en conversa con Nós Diario, que o traballo procurará “calcular o impacto que xera a industria musical, de maneira directa ou indirecta e mais a súa contribución á economía e ao emprego na Galiza”. Para conseguilo, explica Bastida, teñen que medir “moitas industrias, tal e como faríamos noutro tipo de sectores”. Neste aspecto, a investigadora indica que “non atopamos até agora un estudo anterior que perimetre e cuantifique o potencial que pode ter a industria da música para considerala como estratéxica, algo que nós consideramos como posíbel”. Montse Davila (Galadriel): "Que contidos tan potentes como 'Os aneis de poder' poidan ser vistos en galego é algo moi bo" Diante da “falta de datos”, desde Posmark optaron por realizaren enquisas a través dun cuestionario que facilite saber “que volume da industria corresponde ao xestor, cal ao músico e cal ao técnico de luces”. Pon como exemplo as entradas dun concerto “onde hai unha parte que vai para o artista e outra que entra na rolda da actividade económica” que pode ser, exemplifica Bastida, “desde a gastronomía até a loxística, pasando pola seguridade”. O impacto da pandemia no sector En relación ao aumento dos cachés, un dato que aínda está por estudar neste estudo de investigación, Bastida opina que “a pandemia da Covid-19 foi un punto de inflexión para todo e para todos” e a súa finalización implicou "un maior interese por pasalo ben”. Nesta situación, a estudosa cre que “a Galiza está de moda e o fenómeno dos festivais e eventos musicais no país está tirando” e por ese motivo “entra en xogo a oferta e a demanda”. Por último, indica que está “o tema da inflación”, polo que se produce unha “tormenta perfecta” que provoca que aumenten os cachés. A investigadora da USC conclúe que o equipo de traballo realizará unha revisión dos datos que atopen nas enquisas para poder describir a industria, mais tamén contan con realizar entrevistas presenciais “coas persoas directamente implicadas”, coa intención de “coñecer ben o sector”. Un estudo de 2007 denunciaba "a incerteza e inseguridade" do sector Antes do estudo que realiza o grupo de investigación Posmark da USC para a Asociación Galega de Empresas Musicais (AGEM), en 2007 a antropóloga da Uvigo Fátima Braña concluía unha investigación para avaliar nesa data o sector da industria musical. Na mesma empregou dous cuestionarios dirixidos a 45 artistas e 134 empresas, ademais de realizar 32 entrevistas. Entre as debilidades que atopou figura, en primeiro lugar, “a incerteza, a inseguridade e a falta de cobertura social, que "fan moi difícil vivir da música" e unha “oferta musical local sobresaturada, o que provoca que moi poucos artistas galegos poidan vivir só da súa música”. Ademais, sinalaba na investigación que “o réxime fiscal das contratacións produce economía mergullada, ao non axustarse á frecuencia e importe dos ingresos da maior parte dos músicos”. O estudo tamén botaba en falta “locais de ensaio" e advertía da falta de "circuítos de música e festivais especializados”. A Administración galega e as empresas privadas non escapaban á crítica do sector neste estudo. Neste sentido, denunciaban que “a centralidade da Administración e das fundacións das caixas como clientes principais da música ao vivo altera os prezos dos caches á alza, desprazando do mercado os programadores privados”, ademais de provocar “unha cultura do 'subvencionismo' como un vicio que distorsiona o mercado” e crea unha situación de “competencia desleal que provoca que as empresas musicais rematen traballando para a Administración”.