A Rede Museística de Lugo xa ten programa didáctico para este curso

Coincidindo cos preparativos para o inicio do curso escolar, a Rede Museística Provincial de Lugo pon a disposición dos centros escolares a súa programación para o curso 2024-2025, con propostas tanto presenciais e virtuais elaboradas a partir dos fondos do Museo de Lugo, o Museo do Mar de San Cibrao, o Museo Fortaleza San Paio de Narla e o Pazo de Tor.

O obxectivo é achegar ao alumnado, un curso máis, o patrimonio conservado nos museos, a través dun conxunto de actividades deseñadas para cada etapa -educación infantil, primaria e secundaria-  a partir da experiencia e da investigación educativa que se desenvolve na Rede.

A deputada de Cultura da Deputación de Lugo, Iria Castro, e a xerente da Rede Museística, Encarna Lago, presentaron o catálogo de actividades no Pazo de Tor, coincidindo coa celebración dun obradoiro En tempo presente no que profesionais de museos compartiron e intercambiaron as experiencias na xestión do tempo e na realización de proxectos.

A programación artéllase arredor de catro eixos temáticos -recuperación de historias esquecidas, fomento da igualdade, dereitos culturais e migración- e inclúe itinerarios e obradoiros para visitas presenciais ou virtuais aos distintos museos da rede ao longo do ano.