A Sala Rebullón consolídase como refuxio cultural

A poucos quilómetros da cidade máis poboada da Galiza, Vigo, e nun municipio que integra o rural no urbano, Mos, funciona desde hai seis anos a Sala Rebullón, un exemplo singular de proxecto cultural autoxestionado que asenta a actividade musical do país no propio territorio. A iniciativa partiu das persoas que daquela formaban parte da Comunidade de Montes de Tameiga, a parroquia en que está situada. Un total de 378 familias que, desde o seu nacemento, son todo un referente de loita social por manter un patrimonio natural e cultural constantemente ameazado por intereses urbanísticos. Teatro en Mos: "As que limpan" da compañía A Panadaría Un dos fundadores da sala, e actual presidente da Comunidade de Montes, é Carlos Villar, coñecido polo alcume 'Cao'. En conversa con Nós Diario, explica que o inicio do proxecto coincidiu coa finalización da ampliación do Centro Cultural e Deportivo As Pedriñas, unha infraestrutura que traballaba con éxito trinta anos atrás e que estaba pendente de rematarse “aproveitando o diñeiro da indemnización pola expropiación da autoestrada”. “Cando entramos a formar parte da Comunidade de Montes estaba prevista a realización dunha sala multiusos e mudamos a idea cara a unha sala de concertos e espectáculos”, relata, “non queriamos que fose unha instalación máis que, querendo funcionar para todo, non valese para nada”, engade. A instalación preparouse para acoller eventos de música mais tamén de teatro e de cinema. Como asesores contaron cos técnicos de son Tomás Ageitos e Xabier Carnota, procurando a mellor sonoridade e adaptabilidade para todo tipo de actos culturais. «Queremos facer cousas deste tempo que o día de mañá se consideren pezas tradicionais» Un proxecto activista A Sala Rebullón inaugurouse en maio de 2017 coincidindo coa véspera do Día das Letras Galegas. "Fixemos un festival solidario co pobo saharauí e nel tocaron Ruxe Ruxe, Tiro na testa e Zënzar, entre outros", lembra Villar. Desde a súa posta en marcha, acolleu espectáculos de teatro, danza, circo, performance e, sobre todo, música. Abriu desde o inicio o espazo a agrupacións de músicos, compañías de teatro, selos discográficos e organizadores de charlas. Ademais dun equipo de son profesional, forneceron a sala de elementos para realizar gravacións, ensaios de grupos, programas de televisión e mesmo transmisións en directo vía streaming. Neste sentido, o responsábel actual da sala, Carlos Roca, salienta a Nós Diario o papel que xoga "para os grupos de música que non teñen salas dispoñíbeis e sabendo que as que hai son moi precarias ou caras". “A sala está aberta a calquera colectivo que a precise”, asegura Villar. Pon como exemplo a colaboración que realizaron coa Rede Cría, unha asociación sen ánimo de lucro de familias que fomentan unha crianza respectuosa a nivel galego. “O activismo das comunidades de montes, do feminismo, o ecoloxismo... sabe que ten aquí a súa casa”, afirma. Cos anos, algunhas citas quedaron fixadas como seguras no calendario da Sala Rebullón. Entre elas está o Miúdo Fest (con actuacións como as de Peter Punk), o aniversario da sala, a mostra de teatro, o Napalm Fest e o Metal Fest. Nunha extensa listaxe de nomes figuran, entre outros, grupos como The Turres’s Band, Son da Rúa, Sonoro Maxín, Skacha, Os Carunchos, Os John Deerees, Tanxugueiras ou Broa. A 'Factoría do Deporte' do Celta en Mos, que a Xunta declarará "de interese autonómico", destruirá un acuífero que abastece a zona Autoxestión por bandeira A Sala Rebullón, como a comunidade de montes, funciona coa autoxestión dos recursos propios. É a súa filosofía, mais tamén un funcionamento que vén da propia relación con algunhas administracións. “Non contamos con subvencións, mesmo a Axencia Galega das Industrias Culturais (Agadic) non nos considera profesionais, polo que distribúe os seus fondos noutras salas que son privadas, malia que pagamos todos os impostos igual que o resto”, sinala o membro da directiva da Comunidades de Montes de Tameiga. Porén, cos ingresos que consegue a entidade manteñen durante todo o ano entre 30 e 35 postos de traballo. A Deputación de Pontevedra si sumou este proxecto ao Pontegal, o catálogo de grupos musicais galegos que lles facilita a contratación dalgunhas formacións. Por último, Rebullón figura nos circuítos "Girando por salas" da Asociación Cultural Coordinadora Estatal de Salas de Música en Directo e Artistas en ruta, unha iniciativa da Sociedade de Artistas Intérpretes e Executantes (AIE). Premio á xestión comunal en Mos fronte á especulación Este mes a sala comezará un paro coa chegada do verán, lóxico pola entrada en escena de festivais por todo o país. As actuacións volverán no outono, cos concertos de Mondra (28 outubro), Diablo Swing Orchestra (18 de novembro) e o Ghallaecia Metal Fest (25 de novembro). A Rebullón fecha tempada con Poa Ogrupo Poa, a banda creada como proxecto de fin de carreira do alumnado da Escola Municipal de Vigo de Música Folc (Etrad), será o encargado o 18 de xuño ás 12.30 horas de fechar a tempada de actuacións na Sala Rebullón. Claudia Abril (voz, percusión), Marina González (violín) Antón Pombar (acordeón diatónico) e Beatriz Grande (zanfona) foron quen de crear esta formación ao longo dos dous anos da materia de Conxunto Instrumental.