O San Froilán regresa a Lugo nunha semana de festa con máis de 200 actividades

Desde o hoxe até o 12 de outubro non haberá rúa dentro da muralla de Lugo na que música, teatro, obradoiros ou ruadas non acompañen a quen se achegue á cidade. Máis de 200 actividades coas que o concello lugués vive as festas do San Froilán, cuxas orixes se remontan ao século XVII e cunha tradición tal que personaxes como Álvaro Cunqueiro ou Ánxel Fole teñen empregado as súas letras para enxalzar estas festas. Maite Ferreiro, edil de cultura do concello de Lugo, asegura en declaracións a Nós Diario que esta lonxevidade é unha das claves do éxito do evento, chegando a afirmar que “as festas do San Froilán implican 269 anos da historia da cidade”. Así, a concelleira define estes días de troula como “unha celebración das raíces culturais e tradicións e un xeito de entender e vivir”. As festas do San Froilán, coñecidas como a xoia do outono galego, resultan nunha mestura entre “modernidade e tradición” na que todos os públicos poden atopar algunha actividade de interese, xa sexa na programación especial para a rapazada do San Froilán Miúdo, no día das persoas maiores ou en calquera das decenas de obradoiros e concertos que abranguen desde o jazz ao pop, pasando polo blues, a electrónica, o rock ou a música tradicional. A rúa nova, a praza da soidade, a praza de Santo Domingo, o Recinto Feiral... non hai recuncho da cidade que non se vista de festa. Con todo, a peonalizada praza da Mosqueira, a praza de Santa María, a Horta do Seminario ou a praza Maior son algúns dos enclaves principais da programación duns días nos que a música é unha das grandes protagonistas. Para Maite Ferreiro a importancia de “descentralizar as festas” reside na procura de levar as actividades a toda a cidadanía, mantendo presentes “as persoas que non poidan ou non queiran desprazarse”. Lugo prepárase para un San Froilán con máis de 200 actividades e previsión de bo tempo: consulta aquí o programa completo Para que non quede barrio de Lugo sen desfrutar das festas, na programación inclúense propostas itinerantes, como é o caso do San Froilán Máxico no teu Barrio, unha iniciativa que achegará o ilusionismo a todas as familias con varios pases en até catro localizacións diferentes. O espectáculo WOOW, do Centro Anternacional de Arte Cómica italiano, coñecido como Teatro C’Art, será, a través dos elementos surrealistas, de clown e de humor non verbal, outra das actividades móbeis. Pola súa parte, as ruadas invitarán tamén a percorrer os espazos da contorna cunha mirada diferente. Con pases todos os días a diferentes horas, decenas de grupos de música tradicional da cidade e dos arredores traerán á muralla as súas alboradas. Con isto presente, o San Froilán mantense, como salienta a concelleira de cultura, como “unha festa que se vive na rúa” e “unha cita indispensábel na que a cidade cobra vida”. Unha semana de festa A festa comezará hoxe ás 20 horas co pregón a cargo da neurocientífica pastoricense (A Terra Chá) Sonia Villapol. Unha elección que reflexa, en palabras de Maite Ferreiro, “que a investigación tamén se pode explicar en galego”. Á investigadora acompañarana os xigantes e cabezudos e a recreación da familia Pelúdez, uns personaxes con moita historia no San Froilán e que deben as súas orixes a unha tira cómica do ano 1908. O humor tamén ten oco coas actividades do San Froilán Sorrí, nunha xornada na que os monólogos de Danny Boy-Rivera, Oswaldo Digon e David Perdomo animarán a noite do día 12. Son moitos os encontros, feiras e festivais que completan unha programación para todos os públicos e intereses, proba disto é a II Feira de Olaría Tradicional, a Feira de antigüidades e coleccionismo, a V Feira de Asociacións de acción social, a XXX Feira do Mel ou mesmo unha Feira Medieval. O Lucus Music Fest combina actuacións e formación musical A tradición ten un peso importante na programación deste San Froilán. Así, alén dos concertos de música folk e do carácter popular das ruadas, a XXIV Mostra de música tradicional ou a proposta da iniciativa Cultura e Tradición no Camiño son actividades que avogan pola conservación da cultura galega a través de diferentes talleres, obradoiros e demostracións. Así mesmo, o Desfile de Gando Tradicional ou as Arquitecturas Efémeras do San Froilán recuperan a historia da festa a través da súa memoria. O Festival de Cultura Tradicional, enmarcado nas actividades do San Froilán Miúdo, é outro dos exemplos da posta en valor da identidade musical da Galiza. Dentro das actividades para a rapazada destaca a variada oferta, con espectáculos teatrais, actuacións musicais, exhibicións de baile, actividades lúdicas, xogos populares... No afán por chegar a todos os públicos, o día 9 contémplase unha programación especial baixo o paraugas do día das persoas maiores. O deporte aparece tamén moi presente na oferta. Voleibol, judo, billar, dardos, padel... Torneos e abertos para desfrutar da actividade física nestes días festivos. Todo isto sen perder a esencia das verbenas de orquestra, as casetas de polbo ou as atraccións localizadas dentro dun recinto feiral no que se atopan máis de 170 postos. Maite Ferreiro apunta que a convivencia entre “a diversidade cultural e a tradición local” é a clave do éxito, procurando con isto reflexar “unha mestura entre o amor polo propio e a emoción por descubrir algo novo”. Malia que o 5 de outubro e o Domingo das Mozas son os días grandes do San Froilán lugués, queda por diante unha semana enteira de troula. Bandas emerxentes e artistas xa consolidadas soan con forza nas festas Entre as máis de 200 actividades que se ofertan nestes oito días de troula, a música cobra especial protagonismo. Con festivais de música electrónica, espazos de hip hop, encontros de bandas de música ou a presenza recorrente da Duendeneta, non hai xénero musical que se lle escape ao San Froilán. Durante estes días daranse cita grupos locais e internacionais nunha mestura de estilos e orixes que procuran unha oferta o máis variada posíbel, dando visibilidade a artistas emerxentes que comparten cartaz con grupos xa consolidados. Unha escolla que, como explica Maite Ferreiro, responde á procura de demostrar “a diversidade e talento do concello cunha maior variedade de xéneros co fin de chegar a todo tipo de gustos e idades”. A semana de cine de Lugo celebra 45 anos cunha homenaxe aos irmáns Coira A festa ábrena unha mestura ecléctica que convina grandes dj da escena electrónica co blues, o jazz e rock do saxofonista estadounidense Lou Marini, o indie rock do grupo madrileño Carolina Durante ou o indie-pop catalán de Triquell. O rock de Monster Flesh, o punk de Shego, a fusión de reggae e música latina de Abya Yala, a guitarra do cantante cubano Elíades Ochoa, a influencia xamaicana de High Paw, o techno internacional de Víctor Santana, as versións en galego de De Vacas, o rap de Hard Gz, o ritmo e a enerxía festiva de Festicultores Troupe... Decenas de grupos nun cartaz encabezado por artistas galegas como The Rapants, Grande Amore, Baiuca ou Luar na Lubre e con importantes nomes dentro da escena musical estatal, con referentes nos seus xéneros como Rayden no rap, Ciudad Jara no rock ou La M.O.D.A no indie.