Silvia Penide: "Estou orgullosa do traballo que fun facendo e do camiño que deixo para a xente que vén detrás"
—Como seleccionou e reviviu as cancións que agora forman este vinilo?
Algúns dos temas quedaron como estaban orixinalmente porque eran recentes. Por exemplo, o disco El efecto boomerang saíu en 2019 e quedou totalmente parado porque despois xa non puido facer xira nin nada, polo que recuperamos algúns dos duetos que xa estaban feitos. Tamén volvemos gravar outros temas, como é o caso de "Rebentaba" con Mercedes Ferrer. Foi toda unha experiencia reabrir unha canción que estaba fechada desde 2009, engadirlle instrumentos novos e demais.
É verdade que hai algunhas persoas que me din que faltan cancións, como "Amo", que foi un tema que marcou un antes e un despois, mais tivemos que facer un traballo de selección porque tampouco tiñamos a posibilidade de regravar todas. Somos unha pequena empresa e tivemos que facer ese exercicio de apostar, mais sabendo onde estamos e sen perder a cabeza. Outra cousa que fixemos foi unha mestura de todas xuntas para que tivesen unha sonoridade similar, xa que viñan de discos moi dispares e non queríamos que houbese un salto moi grande. Nese sentido, tamén estou moi contenta de traballar con Arturo Vaquero, Paul Álvarez e con David San José, que estiveron aos mandos da produción e conseguiron facer fácil o que parecía complicado.
—Precisamente, salientan as voces que a acompañan nestes temas.
Queríamos que tivese un significado de colaboración. O certo é que son unha artista que non enche recintos, mais nunca me falta traballo e dentro do gremio estou en contacto con moita xente. Sempre digo que as persoas que nos dedicamos a isto temos, en xeral, pouco contacto, mais cando estamos facendo algo conxunto é un contacto moi intenso.
Somos como unha especie de satélites as unhas das outras e facer isto parecíame moi significativo, polo que tamén axudou bastante á hora de escoller os temas que ían estar incluídos. Foi un proceso moi bonito porque, por exemplo, Arturo mandoume fotos e notas de audio de cando graváramos "Rebentaba". Emociónome ao velo porque me parece que a Silvia desas fotos era moi valente.
Tamén foi moi bonita a acollida que tiven por parte das persoas que colaboraron. Cando saíra a canción "El salto", Guadi Galego escribírame unha mensaxe súper bonita porque lle gustara moito, así que agora aproveitei o momento para tirarlle a caña e liala para gravar este tema para o vinilo. Recibín un si rotundo no momento, aínda que están ateigadas de traballo, e algo similar pasou con Andrés Suárez, que nestes momentos está tocando a un nivel moi grande. Tamén é certo que hoxe en día temos a sorte de poder traballar con notas de audio ou a gravadora do móbil e non perde a maxia aínda que non sexa posíbel gravar no mesmo estudo e darnos unha aperta.
—Ten algún plan para os próximos anos?
Eu nunca pensara en sacar un vinilo, foi idea de Tomi Legido, o meu representante, que despois de tantos anos comigo xa é como da familia. Tiven bastantes dúbidas de que tivera cabida e o certo é que despois quedei gratamente sorprendida porque incluso persoas que non teñen onde escoitalo o mercan, quizais porque aprecian ese valor engadido. Por iso creo que estou en boas mans e tamén é o que digo sempre: o día que teña que botar o peche estarei súper orgullosa de todo o que fun facendo e do camiño que deixo para a xente que vén detrás e que quere dedicarse a isto. Veña o que veña, estou moi tranquila.
No que respecta a proxectos a medio prazo, gustaríame sacar un novo disco a finais de 2024 e rematar este ano como temos pensado. Sairemos agora a tocar un pouco fóra e volveremos para Arteixo para rematar o ano e esta xira de celebración das dúas décadas. Sen ser moi ambiciosa iso sería o ideal para min agora mesmo, rematar o ano tan ben como estamos agora, ter traballo o ano que vén e que todo continúe xirando cos meus proxectos.