VÍDEOS | A solidariedade con Palestina ateiga as prazas de Malmo contra a participación de Israel en Eurovisión

A cidade sueca de Malmo, onde esta semana decorre a 68 edición de Eurovisión, está sendo este sábado escenario de multitudinarias protestas en apoio de Palestina e en contra da participación de Israel no festival de música.

A plataforma Stop Israel, integrada por 66 organizacións que convocan as mobilizacións, destacou que por segunda vez (tamén coincidindo coa semifinal da quinta feira) miles de persoas expresan en Malmo o seu desacordo coa participación israelí no festival.

O portavoz da Policía da cidade, Rickard Lundqvist, confirmou horas antes un "despregamento excepcional ante calquera eventualidade en relación a estas actividades de libre expresión".

Policía chegada de Noruega e Dinamarca

Neste despregamento participan incluso unidades policiais procedentes de Noruega e Dinamarca, que traballan baixo a dirección sueca con todas as competencias necesarias para intervir, segundo explicou Lundqvist.

Ademais, a Policía prohibirá a entrada da poboación a determinadas partes da cidade de Malmo e empregará avións non tripulados para observar a actividade das persoas manifestantes durante a mobilización.

Rusia e Israel

Outra das críticas que está a percibir a organización do festival, que se cualifica de apolítico, é que mentres Rusia foi vetada pola guerra en Ucraína, non se tome a mesma consideración con Israel despois de miles de mortes provocadas pola súa intervención en Gaza.