A paralización de parques eólicos nos tribunais provoca as primeiras suspensións das expropiacións previstas
As decenas de suspensións cautelares decretadas polo Tribunal Superior de Xustiza da Galiza contra proxectos eólicos autorizados polo Goberno galego empezan a ter consecuencias. A Consellaría de Economía e Industria vén de notificar a paralización do procedemento expropiatorio para a construción do parque denominado Meirama, no concello de Carral, Cerceda e Ordes (comarcas da Coruña e Ordes), que en abril foi freado polo alto tribunal galego mentres non se dite sentenza a respecto do seu potencial impacto sobre a contorna.
Quedan paralizadas, en consecuencia, as expropiacións que afectaban predios comprendidos nos lugares das Encrobas, Bordeiro, Monte Meán, Berdoedo, Mexón e Entre Camiños, e son perto dunha decena as persoas propietarias afectadas. O levantamento de actas estaba previsto inicialmente que comezase o pasado 17 de abril, mais a propia Consellaría aclara na súa resolución que a recente decisión xudicial obriga a deter a expropiación de terras para ese parque que fora declarado "de utilidade pública" pola Administración galega.
O xigante enerxético Naturgy é quen está detrás deste proxecto, que se erguería sobre os terreos da antiga central térmica, fechada en 2020 e derruída este ano. Estaría formado por dez aeroxeradores que sumarían unha potencia total instalada de 44,5 megawatts (MW).
E ao caso de Meirama poderían sumarse varias decenas máis nas próximas datas, pois até o momento o TSXG resolveu un total de 74 expedientes sobre solicitudes de suspensións cautelares que afectaban 43 parques eólicos, dos que 40 foron paralizados.