O salario medio na Galiza é 25,3% inferior ao do conxunto da Unión Europea
O salario medio ordinario bruto nos 27 Estados da Unión Europea (UE) foi en 2022, de media, de 2.302 euros mensuais. Pola súa parte, a remuneración media mensual galega, de 1.672 euros, resultou 25,3% máis baixa. En termos absolutos, esta diferenza é de 630 euros mensuais (7.556 euros por ano), segundo os datos publicados esta segunda feira no IX Monitor Adecco sobre Salarios (III).
O informe destaca que a Galiza se atopa nunha situación “intermedia” no contexto comunitario, pois hai 15 Estados da UE cuxos salarios medios son inferiores ao do país, mentres que outros 12 teñen remuneracións maiores. Nesta comparanza, segundo o documento de Adecco, a situación do salario galego atópase xusto por debaixo da remuneración media do Estado español.
Entre outros exemplos, a fenda salarial entre a Galiza e Alemaña alcanzou en 2022 os 1.476 euros mensuais (17.706 euros ao ano), o que implica que a remuneración galega foi 46,9% máis baixa que a xermana. Esta diferenza significa que unha persoa asalariada galega coa retribución media necesita traballar 23 meses para ter un ingreso similar ao que ten unha asalariada media de Alemaña durante un ano.
O exemplo contrario xorde da comparanza con Bulgaria, pois o salario medio galego é 2,6 veces maior que o búlgaro, de 650 euros ao mes, cunha diferenza mensual de 1.022 euros (12.269 euros ao ano). Isto significa que unha asalariada media na Galiza gaña en menos de cinco meses o mesmo que unha de Bulgaria en todo un ano. Polo tanto, unha traballadora de Bulgaria tardaría case 31 meses en gañar o mesmo que unha asalariada media galega durante un ano.
Até 11 Estados cun salario por baixo dos 1.200 euros
Dentro da UE, hai un total de 11 Estados cun salario medio inferior a 1.200 euros por mes. Trátase de Bulgaria (650 euros ao mes), Romanía (796 euros), Hungría (852 euros), Croacia (903 euros), Polonia (941 euros), Letonia (978 euros), Eslovaquia (1.046 euros), Grecia (1.049 euros), Lituania (1.110 euros), Estonia (1.123 euros) e Portugal (1.154 euros mensuais). Aínda que todos se atopan no chanzo máis baixo entre os Estados da UE con salarios medios por baixo dos 1.200 euros mensuais, existe unha gran disparidade entre estes, xa que as retribucións medias de Portugal case duplican as de Bulgaria.
Ademais, sete Estados fican no grupo de salarios intermedios, o mesmo que o da Galiza (1.672 euros ao mes), ao contar cun salario medio de máis de 1.200 euros e por baixo de 2.600 euros. Trátase da República Checa (1.208 euros ao mes), Malta (1.354 euros), Chipre (1.359 euros), Eslovenia (1.503 euros), o Estado español (1.822 euros), Italia (2.174 euros) e Francia (2.574 euros mensuais).
Por último, nove Estados rexistran salarios medios de máis de 2.600 euros ao mes. Son os casos de Suecia (2.604 euros mensuais), Finlandia (2.678 euros), Austria (2.964 euros), Países Baixos (2.964 euros), Bélxica (3.007 euros), Irlanda (3.051 euros), Alemaña (3.148 euros), Dinamarca (3.573 euros) e Luxemburgo (3.713 euros ao mes). Este grupo é máis homoxéneo que os outros dous, xa que a maior diferenza entre Estados deste chanzo é inferior a 30%.
As retribucións son 150 euros ao mes máis baixas que no Estado
O salario medio ordinario bruto do Estado español é, segundo o informe de Adecco, de 1.822 euros mensuais, 150 euros máis alto que a retribución media galega, de 1.672 euros ao mes. Na comparanza con Francia (2.574 euros mensuais), a cifra salarial rexistrada na Galiza é 902 euros ao mes máis baixa. Pola contra, a retribución media do país é 518 euros ao mes máis alta que a rexistrada en Portugal (1.154 euros mensuais).
Das distintas definicións para referirse aos salarios, Adecco utiliza neste informe a do salario ordinario bruto, que inclúe os pagamentos de regularidade mensual antes de computarse as deducións e retencións correspondentes. Destas contías quedan excluídos, en consecuencia, todos os pagamentos non regulares (como pagas extraordinarias, horas extras, atrasos e indemnizacións).