Con 96,87% escrutado, o CNE certifica por segunda vez a vitoria de Maduro nas eleccións
O candidato opositor, Edmundo González, obtivo 43,18% dos votos, fronte ao 51,95% do presidente venezolano.
O presidente do Consello Nacional Electoral (CNE) de Venezuela, Elvis Amoroso, certificou esta sexta feira por segunda vez a vitoria do presidente, Nicolás Maduro, nas eleccións presidenciais decorridas o pasado domingo, cun 96,87% dos votos escrutados.
Maduro obtivo un 51,95% dos votos fronte ao seu principal Rival, Edmundo González, da Plataforma Unitaria Democrática (PUD), cun 43,18% dos apoios.
Nun terceiro lugar estaría o candidato de Acción Democrática (AD), Luis Martínez, cun 1,24% dos votos. O resto de aspirantes non superan a barreira do 1%. Igualmente, a participación dos comicios situouse nun 57,97%, segundo recolleu o diario El Universal.
Ausencia de González na sala electoral
Maduro acudiu na sexta feira á sala electoral do Tribunal Supremo de Xustiza de Venezuela após presentar un recurso de amparo co obxectivo de dirimir o proceso electoral. Xunto a el acudiron outros candidatos, aínda que destacou a ausencia de Edmundo González, que foi recoñecido por Estados como os EUA como "presidente venezolano lexítimo".
Precisamente, despois de que o CNE publicara os resultados que lle volven dar a vitoria a Maduro, o Tribunal Supremo solicitoulle que entregue as actas das eleccións presidenciais nun prazo de tres días e habilitou un despacho as 24 horas do día para este caso.