Jazz e músicas improvisadas nos Martín Códax

O pasado 15 de maio entregáronse os Premios Martín Códax da Música no Pazo da Cultura de Pontevedra. Estes premios agroman da iniciativa da asociación Músicas Ao Vivo co patrocinio da famosa adega de albariño. A continuación, imos falar da asociación, dos premios e dos proxectos finalistas na categoría Jazz e Músicas improvisadas. Músicas Ao Vivo nace no ano 2008 co obxectivo de unificar as inquedanzas do colectivo. A filosofía desta asociación baséase en dignificar a música en directo e o traballo das músicas e dos músicos. A día de hoxe, a asociación ten preto de 500 socias. En 2010 créase a cooperativa coa intención de regularizar a situación laboral dos socios. O éxito da iniciativa trae un aumento das altas de músicos na Seguridade Social e das achegas fiscais dos músicos a través do IRPF e a través do IVE. Músicas Ao Vivo está xa asentada como a asociación/cooperativa de referencia na defensa dos dereitos do colectivo. Os Premios Martín Códax da Música nacen co obxectivo de dar visibilidade e recoñecer a diversidade e a calidade artística das producións musicais de Galiza. Xa na súa undécima edición están consolidados como os premios máis importantes na música galega. Nesta edición –na categoría Jazz e Músicas improvisadas– inscribíronse 17 proxectos, dos que resultaron finalistas 3: Orquestra Galega De Liberación Proxecto liderado por un dos músicos máis activos da escena galega: o contrabaixista Xacobe Martínez Antelo. Membro fundador da banda de jazz máis internacional da Galiza, o trío Sumrrá, entre outros moitos proxectos. OGL trátase dunha banda de vangarda no que unha vintena de músicas e músicos se reúnen na procura de novas formas de creación espontánea mediante a improvisación libre. Esta formación congrega músicos do mundo clásico, do jazz, das músicas de vangarda e da performance. Diego Alonso con 'Nihil' Proxecto liderado por este novo valor do saxo na Galiza. Vigués formado no Porto, achega outros dous músicos emerxentes, Pablo Patiño (contrabaixo) e Antón Quintela (batería), xunto aos xa consolidados Xan Campos (piano) e Virxilio da Silva (guitarra). Trátase dun primeiro traballo moi solvente e maduro –a pesar da xuventude do saxofonista– que ben merece a atención do público e o nomeamento aos premios. Pablo Sanmamed Trio + Benxamín Otero Este foi o proxecto gañador. Pablo Sanmamed é un dos músicos máis completos e eclécticos do país. Baixo, contrabaixo, composición, arranxos… Acumula nove premios na súa traxectoria. Ademais de ter gravado unha cantidade inxente de discos –como líder, sideman ou músico de sesión– destaca como compositor e arranxista no seu trío e na elaboración de bandas sonoras. A máis coñecida, a do filme Crebinsky. O disco presentado aos premios (Zugunruhe, inquietude migratória) está formado por 8 temas orixinais, un arranxo dun tema tradicional asturiano e outro da cantiga número 78 de Alfonso X. Un disco interesantísimo e ecléctico como o propio contrabaixista. O vindeiro día 6 de xuño poderemos ver a Pablo Sanmamed (ao lado de Juanjo Fernández e Vadim Yukhnevich) abrindo a Compostela Swing &amp; Manouche Jam Session na Casa das Crechas (Santiago de Compostela).