Santi Araújo, a pulsión de bailar

C omezamos maio cunhas ganas tolas de que chegue por fin algo de luz, con ganas de saír á rúa e buscar sorrisos ou un niño de cegoña nalgún campanario… Son as pistas que vai deixando a primavera cando se deixa caer polos lugares… Eu persoalmente, espero con ansia o día no que pola noitiña comezan a cantar os grilos, nese momento sei que xa non hai volta atrás, a primavera chegou sen dúbida. E como unha invitación a cantar (e a bailar), Santi Araújo acaba de lanzar o seu segundo álbum de estudo titulado Cancións para bailar. Tamén estivo dando pistas sobre este novo traballo, desde que estreou os avances "Bailar", "Jilguero" e "Pedra do camiño", e finalmente podemos gozar destas catorce novas cancións que nos ofrece. Este álbum marca un cambio notable con respecto ao seu traballo anterior, Suelta Ø Muerde, xa que Cancións para bailar é unha proposta máis alegre e luminosa. Para celebrar este lanzamento, Santi preparou unha edición física en vinilo, case artesanal, que é unha verdadeira xoia para coleccionistas. Este disco, baixo o selo Ernie Records, é realmente moi especial para Santi, xa que é o seu proxecto máis persoal ata o momento, no que non só canta e interpreta as cancións, senón que tamén toca a maioría dos instrumentos. Ademais, incorporou algúns elementos sorprendentes, como un sampler coa colaboración de Emilio José ao saxofón e un tributo especial a Jaime Mateo, o batería de Os Amigos dos Músicos, quen lamentablemente nos deixou hai uns meses. En Cancións para bailar, Santi rende homenaxe ás súas influenzas musicais, e iso é especialmente evidente no último corte do disco, onde inclúe un discurso do gran compositor e cantante galego Fran Pérez "Narf". Destacamos outro dos cortes do disco Faro, que comeza cunhas frases que me teñen namorada: "Sorrir ao amencer" e "o belo é inimigo da présa". Tamén hai que destacar que Cancións para bailar chega cunha coidada influencia xaponesa sobre a que xira este traballo. Unha cultura moi parecida á galega, xa que ambas teñen un profundo amor polas súas tradicións e nelas o mundo mariñeiro tamén ten moita relevancia. Cancións para bailar é unha proposta diferente desde a súa propia xestación, pois é un traballo analóxico, gravado en cinta. Un LP alegre, no que non fai falta moito máis que pulsar play e deixarse levar. O disco é, en si mesmo, un baile perpetuo, puro bo rollo, perfecto para iniciar os bailes nesta primavera, pois é un recunchiño polo que quere pasar a luz. Estade atentas ás datas de presentación deste disco, cunha banda totalmente renovada e un directo cargado de sensibilidade e forza a partes iguais.