Sororidade musical ilustrada

Coñecía a Laura Romero, ilustradora e urban sketcher, do proxecto Músicas Galegas Ilustradas, do que son moi seareira desde hai anos. Alí retrata diferentes mulleres do panorama musical, do presente e do pasado, para visibilizalas. Pola súa banda, Iria Pedreira é filóloga, tradutora e crítica literaria. E foi quen se encargou dos acertados textos. Adorei como escribe. Ferreñas e Rock and Roll / Laura Romero e Iria Pedreira / Baía Edicións / 2019 / 17 euros Ambas coñecéronse na Escola de Música de Ordes e agora sacan este libro, da man de Baía Edicións. Iria Pedreira é música amadora (frauta traveseira) e Laura Romero é baixista en Zënzar e MJ Pérez. Segundo nos contan no limiar, este libro é unha prolongación de Músicas Galegas Ilustradas, e o obxectivo é o mesmo, seguir visibilizando o papel das mulleres na música. Son máis dunha trintena de mulleres as que aparecen, con historias sorprendentes. Destaco as daquelas que viviron en tempos pasados e que se enfrontaron con moita determinación aos obstáculos impostos polo patriarcado. Menciónanse no libro, ademais, un par de cuestións sobre a discriminación da muller na música. Por un lado, que pese a haber tantas e tan boas músicas, nos festivais a súa presenza é moi escasa se a comparamos coa dos homes. Por outro, que sofre unha dobre marxinación: por muller e por facer música en galego. E eu estou completamente de acordo con Laura e Iria. A lectura do libro provocoume unha sensación agridoce. Dunha banda, tiven a ledicia de coñecer historias fantásticas, de mulleres bravas que contra vento e marea seguiron facendo o seu traballo. Porque ás veces, ser música e muller xa é, en si, un acto político e de rebeldía, sobre todo en certos estilos de música. Doutra banda, entristeceume moito decatarme do pouco que sei, que sabemos, sobre este legado. Sobre mulleres tan sobresaíntes. A lectura deste libro foi para min unha raiola de luz asombrosa. Ferreñas e Rock and Roll leva detrás un vasto e meticuloso traballo de documentación. Ademais, é moi ameno na lectura. Cada artista ten un resumo da súa biografía, nada aburrida, no que se conta o máis destacábel desde un punto de vista moi humano. Deixádevos levar e mergulládevos neste Ferreñas e Rock and Roll! "Dobre invisibilidade das mulleres, porque ao patriarcado de escenario, nesta parte do mundo, sumouse a propia marxinación que sufriu a música que se fai en galego na propia Galiza. Entón chegou Laura a nos traer tanta luz".