Ulla, 'mon amour'

Un solpor á beira do Ulla. Iso foi a primeira pinga que resultou na canción que dá título e inspira este álbum. Este outro "Ulla", que crea unha corrente sobre a que navegar polo resto da gravación: sons de ambient que van escalando cun bombo a negras para ir hipnotizándonos pouco a pouco cunhas voces etéreas utilizadas como un instrumento máis. Ábrense camiño na ponte as obrigatorias cordas de todo tema de downtempo digno (as comparacións con Emancipator e semellantes son tanto inevitables coma favorables) e regresan os sons tribais de sintetizador para liquidar introducindo ese compoñente noise industrial que forma outra peza do característico son desta banda ferrolá. Aquí hai de todo, mergullándonos tamén nunha modernización do city pop con toques lo-fi para seguir cunhas liñas de sintetizador extremadamente pegañentas e agresivas. Si, é destes discos que podes poñer sendo DJ en calquera garito de electrónica e ir tranquilo a fumar os cigarros que queiras e pedir a túa copa gratuíta á barra. Crédeme que é unha especie que non abunda no catálogo musical universal contemporáneo, e moito menos na escena galega. En directo ten que ser unha auténtica experiencia. Nota para os organizadores do Son do Camiño: menos J Balvin e máis Músculo! Aínda que no cartel deste ano hai dous artistas que encaixarían á perfección con esta banda, o produtor francés Vitalic e o lendario dúo Pet Shop Boys. Temas como "Elvira" non desentoarían nun LP do artista galo: ritmos mesméricos cunha modelaxe de son dominada por agudos asubiantes que atravesan pads ben acolchadiños, como alfinetes no seu alfineteiro. Desculpade tanto anglicismo, pero estes estilos de electrónica aínda están por codificar dentro do panorama musical galego, circunstancia que fai que este álbum soe aínda máis fresco se cabe. Unha aposta atrevida pero tremendamente consolidada, nótase o meticuloso traballo e o mimo matemático detrás de cada combinación de onda, cada secuencia de samples e de cada parámetro do ecualizador. A produción, impecable. Uns cracks, vaia. Calquera amante da electrónica, o ambient ou simplemente a boa música vai levar unha fermosa sorpresa. Non quero desvelar moito máis deste LP que nunca decae nin deixa de sorprender, ben sexa cravándonos a golpe de martelo industrial ou elevándonos nunha nube de ecos e reverberacións secuenciadas, posto que merece a pena descubrilo un mesmo. Atentos a calquera concerto desta banda perto de vós. E se non é perto, ide ata aló. Esta viaxe merece a pena.