'Nós Diario' entrevista os candidatos ao Congreso pola Coruña
Nesta campaña electoral de cara ás eleccións estatais do 23 de xullo, 'Nós Diario' achega unha serie de entrevistas aos principais candidatos e candidatas ao Congreso e ao Senado polas catro circunscricións galegas para coñecer os seus programas e propostas. Hoxe é a quenda dos candidatos ao Congreso pola circunscrición da Coruña, que son Néstor Rego (BNG), José Miñóns (PSOE), Marta Lois (Sumar) e Marta González (PP).
A cidadanía dos concellos pertencentes á circunscrición da Coruña, ao igual que o resto da cidadanía galega, ten unha cita coas urnas o vindeiro 23-X. Nas anteriores eleccións estatais dos oito escanos que se reparten neste territorio tres foron obtidos polo PP, outros tres polo PSOE, un por Podemos-EU e o outro polo BNG.
Co obxectivo de coñecer de primeira man os programas e propostas das principais candidaturas, Nós Diario contacta coas persoas que encabezan as candidaturas dos principais partidos de cara ao 23-X.
Néstor Rego (BNG): "Sacar representación nas 4 provinciais é un obxectivo moi factíbel para o BNG"
Actualmente ocupa o escano que o BNG logrou en novembro de 2019 no Congreso dos Deputados. Néstor Rego repite como cabeza de lista pola circuncisión da Coruña da formación nacionalista. Na entrevista, Rego os obxectivos e demandas do Bloque.
“Non queremos só arrancar acordos que melloren as condicións de vida das galegas e galegos, senón de ter capacidade para facelos cumprir”, explica Rego.
José Miñóns (PSOE) "Este é o Goberno español que máis investimento realizou na Galiza"
É o actual ministro de sanidade e anteriormente ocupou o posto de delegado do Goberno español na Galiza. José Miñóns explica na súa conversa con Nós Diario o que, segundo el, está en xogo este 23-X.
“O resultado que teñamos nestas eleccións a nivel estatal afectará ás autonómicas. Se gaña Núñez Feixoo e imos a un Goberno con Abascal de vicepresidente, teremos seguro unhas autonómicas adiantadas”, indica Miñóns.
Marta Lois (Sumar): "Sumar é un espazo que vén para quedar e concorrerá ás eleccións galegas"
Politóloga e profesora universitaria, Marta Lois ocupa o primeiro posto na lista de Sumar de cara ás eleccións deste domingo. Conversou con este xornal para tratar as expectativas da súa formación e o seu programa.
“Queremos seguir facendo unhas políticas útiles para a xente, políticas de feitos que ofrezan solucións para a agricultura, a pesca, para a industria ou para o emprego”, salienta Lois.
Marta González (PP): "O Goberno Sánchez foi un Goberno hostil para os intereses da Galiza"
A número dous dos populares pola circunscrición da Coruña é Marta González que na actualidade é deputada no Congreso e portavoz adxunta do PP nesa cámara. En conversa con Nós Diario analiza as perspectivas do PP.
“A verdade é que o PSOE bloqueou calquera avance na perspectiva de transferir á Galiza a autoestrada do Atlántico, AP-9, libre de peaxes”, indica González.