Tres días consecutivos de atrasos desde a estrea dos trens Avril

Unha nova incidencia técnica provocou tamén esta quinta feira, na súa terceira xornada após a 'inauguración', atrasos na conexión da AVE Avril entre Vigo e Madrid. Neste caso, as pasaxeiras e pasaxeiros afectados foron os do tren Avril que debía saír da estación madrileña de Chamartín ás 19.18 horas.

Fontes de Renfe consultadas por Europa Press confirmaron que, debido a unha incidencia técnica, o tren con destino a Vigo partiu finalmente con 55 minutos de demora. No resto da xornada non houbo incidencias, aínda que esta é o terceiro día consecutivo no que se rexistran problemas técnicos. E é que o segundo AVE Avril que partiu na mañá desta cuarta feira da Galiza tamén chegou a Madrid con algo menos de 20 minutos de atraso.

Neste caso, unha incidencia cunha porta atrasou a saída do tren desde Vigo uns 25 minutos, pero foi solucionada e o convoi só chegou 18 minutos despois da hora prevista á capital española.

Esta situación deuse precisamente un día despois da estrea destes trens esta pasada terza feira, cando o primeiro Avril que saíu da Galiza tamén quedou parado máis de dúas horas e media a escasos metros da estación de Ourense por unha incidencia no tren.

Renfe subliñou que se mantén o seu compromiso de puntualidade, polo cal se estabelecen distintas compensacións ás persoas usuarias. En concreto, ao tratarse dun AVE, se o atraso na hora de chegada a destino é superior a 15 minutos devólveselles aos pasaxeiros o 50% do seu billete. No caso de que supere os 30 minutos, os viaxeiros recibirán o 100% do prezo que pagaron polo seu traxecto.