A Galiza foi en 2023 a quinta comunidade autónoma do Estado español coa taxa máis baixa de delitos contra a liberdade sexual, ao rexistrar 3,4 casos por cada 10.000 habitantes. Este valor só é máis baixo en Asturias (3,2), Castela e León (3), Cantabria (2,9) e Estremadura (2,9).
Segundo consta nun informe feito público esta sexta feira polo Ministerio do Interior, en todo o Estado español rexistráronse o ano pasado 21.825 ilícitos desta natureza, o que lanza unha taxa de 4,5 por cada 10.000 habitantes, superior á galega.
Na Galiza, tívose coñecemento de 924 delitos sexuais o ano pasado, que son un 28,5% máis que no mesmo informe do ano 2022, cando foron 719. A gran maioría (uns 700) dos rexistrados o ano pasado foron agresións e abusos sexuais: 502 sen penetración e outros 201 con penetración.
A estes súmanse 27 delitos de acoso sexual, 34 de contacto con menores de 16 anos mediante medios tecnolóxicos, 12 de corrupción de menores, 23 de exhibicionismo, 43 de pornografía con menores, 39 de prostitución, 30 de provocación sexual e 13 de promoción da prostitución a través das novas tecnoloxías.
De todos os casos mencionados, as forzas e corpos de seguridade do Estado lograron esclarecer na Galiza 799, con 560 persoas detidas ou investigadas.
As agresións e abusos cometidos de forma grupal, é dicir, por dúas ou máis responsábeis, foron 114 no territorio galego o ano pasado, o que implica unha taxa de 0,1 por cada 10.000 habitantes.
