Ulloa Viva pide á Xunta a paralización do proxecto de Altri tras o informe do Consello da Cultura

A Plataforma Ulloa Viva reclamou á Xunta da Galiza que paralice "dunha vez por todas" a tramitación do proxecto que Altri propón para Palas de Rei (A Ulloa) tras o informe elaborado por persoas expertas para o Consello da Cultura Galega (CCG).

Nun comunicado remitido aos medios, a entidade sinala que o documento presentado polo CCG "confirma" as súas advertencias e a súa "preocupación" en relación a este proxecto. "As veciñas e os veciños da Ulloa, Deza, Terras de Melide e Arzúa estamos hoxe máis preocupados despois de que científicos de todos os ámbitos confirmen de forma oficial cuestións como que a contaminación atmosférica de Altri converterá o aire da zona nunha ameaza invisíbel para a saúde", sinala.

Así mesmo, apunta que persoas expertas confirman no documento que Altri pretende ocupar unha illa xeolóxica, case única en toda a península Ibérica, con especies vexetais endémicas xa actualmente ameazadas de extinción, que se verían totalmente afectadas.

"Seguindo coa lectura do informe, sabemos que a instalación incrementaría a demanda de eucalipto para a industria de pasta de celulosa do Estado español en case un 50%, é dicir, que para abastecer esta nova planta habería que incrementar as plantacións de eucalipto na Galiza en case o dobre das existentes na actualidade ou importar un volume moi considerábel desde o sur de América".

Estudos con falta de rigorosidade

Ademais, en relación ao estudo de impacto hidrolóxico presentado por Altri-Greenalia que a Xunta tramita en Augas da Galiza, a plataforma sinala que outro experto avisa de que "non alcanza a rigorosidade necesaria, ao ser extremadamente simple e moi orientado a esquivar o trámite ambiental que outorgue viabilidade ao proxecto".

Ademais, considera que, segundo os datos analizados por un doutor en Ciencias Económicas, trátase dun proxecto industrial de gran tamaño pero cunha facturación modesta en relación ao investimento polo que presentará unha "elevada intensidade en capital" pero "baixa en traballo". "Como consecuencia, a estimación dos empregos directos e indirectos previstos pola empresa están totalmente afastados da realidade", apunta para indicar tamén que se certifica que o estudo de Altri "non tivo en conta os impactos negativos sobre outras actividades da zona, como a agricultura, a gandaría, o turismo e o Camiño de Santiago”.

A entidade asegura que "leu e tomou nota" de todos e cada un do informes sectoriais sobre o proxecto de Altri-Greenalia presentado polo Consello da Cultura, ao que agradeceu "o seu esforzo e traballo por lanzar luz e datos científicos sobre unha cuestión fundamental para o futuro do corazón da Galiza".

Ademais, lembra á Xunta que o Consello da Cultura Galega é un órgano asesor que "fixo o informe para a Xunta”, que está a tramitar o proxecto, e non para a plataforma. Por iso, tacha de "nova falta de respecto" as críticas dos membros do Goberno galego sobre o documento.

"O negacionismo da Xunta respecto da comunidade científica e en favor sempre de Altri-Greenalia é unha actitude indigna nun Goberno que ten que velar polo seu territorio e polos cidadáns", apunta.