O emprego turístico descende un 3% na Galiza durante o segundo trimestre mentres no Estado español aumenta un 3,5%
A Galiza contabilizou no segundo trimestre do ano 126.179 ocupados e ocupadas vinculadas a actividades turísticas, o que supón un 3% menos que no mesmo período de 2023, segundo os datos difundidos esta quinta feira por Turespaña a partir da Enquisa de Poboación Activa (EPA) que elabora o Instituto Nacional de Estatística (INE). Deste total, 96.182 persoas eran asalariadas, un 5,4% menos, e 29.998, autónomas, subindo un 5,6%.
Mentres caeu o emprego vinculado ao turismo na Galiza, o Estado español superou no segundo trimestre do ano os 2,97 millóns de ocupados e ocupadas vinculadas a actividades turísticas, o que supón un incremento interanual do 3,5% e 101.008 empregados e empregadas máis que no mesmo período de 2023.
Desta maneira, a Galiza foi, xunto con Canarias, Euskadi, a Rexión de Murcia, Nafarroa e A Rioxa (esta última co maior descenso, de 22,8%), unha das seis autonomías do Estado español onde descendeu o número de persoas ocupadas en actividades turísticas no segundo trimestre de 2024 con respecto ao mesmo período do exercicio anterior.
Así mesmo, o descenso no mercado laboral galego contrasta cos rexistros de aumento da ocupación no sector turístico que marcou o País Valencià, co maior medre, de 11,8%. A diferenza é ampla tamén na comparativa con Asturias, que sendo unha autonomía lindeira coa Galiza, incrementou 11,3% en termos interanuais os traballadores e traballadoras no sector.
Emprego sen contrato
A difusión dos datos da mingua do emprego no sector turístico galego coincide na mesma na semana na que a Garda Civil anunciou que investiga tres persoas, propietarias de varias vivendas de uso turístico na Galiza, que empregaban traballadoras da limpeza sen contrato, sen dalas de alta na Seguridade Social nin respectar os seus dereitos laborais. A estas persoas investigadas atribúeselles un delito continuado de estafa e outro contra os dereitos dos traballadores.
Contracción da actividade
A contracción do número de empregos no sector turístico galego dáse ademais nun contexto no que o turismo podería limitar o crecemento económico no ano 2025, xa que "se observa certa desaceleración durante os primeiros catro meses de 2024 no gasto en turismo" a nivel estatal e porque "o consumo de non residentes [no Estado] o seguinte ano vaise a estancar", segundo vaticina BBVA Research.