O principal organismo do fútbol do mundo, a FIFA suspendeu, segundo puido saber Nós Diario, o presidente da Real Federación Española de Fútbol (RFEF), Luis Rubiales.
Unha suspensión derivada da polémica polo bico forzado que Rubiales deu á xogadora Jenni Hermoso.
"O presidente da Comisión Disciplinaria da FIFA, Jorge Ivan Palacio (Colombia), en uso das facultades outorgadas polo artigo 51 do Código Disciplinario da FIFA (CDF), acordou no día de hoxe a suspensión provisional do Sr. Luis Rubiales de toda actividade relacionada co fútbol a nivel español e internacional", indicou o máximo organismo futbolístico a nivel mundial nunha nota de prensa.
Esta suspensión será efectiva desde este mesmo sábado e "esténdese por un período inicial de 90 días", segundo precisou a nota, "sempre que se tramita o procedemento disciplinario" que dita Comisión Disciplinaria abriu o pasado 24 de agosto contra Rubiales por mor do seu comportamento tras a final do Mundial feminino.
Non poderá contactar con Hermoso
"Ao obxecto de preservar os dereitos fundamentais" da xogadora da Jennifer Hermoso e tamén "a boa orde" sobre o procedemento disciplinario en tramitación, o presidente da Comisión Disciplinaria ditou dúas directivas adicionais (artigo 7 CDF) mediante as cales ordena Rubiales "que se absteña, el ou terceiros, de contactar ou tentar contactar coa xogadora".
Nin tampouco con "a súa contorna próxima", dixo a nota sobre a sanción a Rubiales, quen tamén é vicepresidente da UEFA. "Igualmente ordénase á RFEF e aos seus oficiais ou empregados, de maneira directa ou a través de terceiros, absterse de contactar" con Jenni Hermoso ou a súa contorna próxima, segundo insistiu o texto de prensa.
A FIFA sinalou que "non ofrecerá máis información sobre este procedemento disciplinario até a adopción dunha decisión final sobre o mesmo" e tamén reiterou "o seu compromiso absoluto co respecto á integridade de todas as persoas e polo mesmo condena co maior vigor todo comportamento contrario".
