As afiliacións á Seguridade Social caen en 1.283 persoas na Galiza e crecen no Estado

O número medio de afiliacións á Seguridade Social fechou o mes de decembro con 1.283 cotizantes menos que na mensualidade anterior. Segundo os datos publicados na xornada de onte polo Ministerio de Inclusión, Seguridade Social e Migracións, a cifra representa unha caída de afiliados e afiliadas de -0,12%, nun contexto onde estas se incrementan no conxunto do Estado en 0,14%. Neste sentido, o volume de persoas traballando na Galiza a finais de 2023 foi de 1.062.280. Os datos deste último mes do ano contrastan cos do conxunto da anualidade. A este respecto, as afiliacións á Seguridade Social medraron ao longo de 2023 en 20.020 cotizantes, o que significa unha alza de 1,7%, unha porcentaxe case un punto inferior á da media do Estado, onde a alza alcanzou a 539.740 persoas, o que representa unha suba de 2,6%. Os números da Seguridade Social para decembro de 2023 e para o conxunto da anualidade certifican un peor comportamento do mercado laboral galego en relación co estatal. As cifras de desemprego marcan unha tendencia semellante. Así, o paro diminuíu neste exercicio na Galiza en 12.768 persoas, o que supón unha caída de 4,1%, medio punto menos que no total estatal. Nesta liña, o ano remata con 129.604 persoas desempregadas, 54.711 homes e 74.793 mulleres, correspondéndose a baixa do paro en decembro, que descende en 1.644 persoas, coa campaña de Nadal, que empuxou das actividades dos sector servizos. O secretario de Negociación Colectiva, Emprego e Industria da CIG, Francisco Sío, referiuse á caída de afiliacións á Seguridade Social sinalando que “isto ten que ver con que aínda que se creou emprego medrou a contratación temporal por circunstancias da produción, que continúa ao mesmo nivel que antes da reforma xa que o único que fixeron foi cambiar o contrato por obra e servizo polo fixo descontinuo”. Sío indicou que “a leve baixada do desemprego está motivada polo aumento da precariedade na contratación”. Neste punto, Francisco Sío desvelou que “a práctica totalidade das novas contratacións rexistráronse no sector servizos, con 1.637 persoas paradas menos dun total de 1.664”. Pola contra, aseverou que “o paro incrementouse nos sectores con mellores condicións, como a industria ou a construción”. O responsábel do sindicato nacionalista afirmou que “a última reforma laboral e as novas modalidades de contratación están a provocar un aumento imparábel da precariedade como consecuencia dun modelo económico baseado na inestabilidade laboral que potencia os sectores máis precarios”. Así, concluíu que “malia que a contratación indefinida medra, faino da man da inestabilidade laboral mediante o abuso da contratación a tempo parcial e da fixa descontinua e do incremento da contratación a través de ETT a un ritmo superior ao que se rexistraba antes da reforma laboral”. O secretario de organización da UXT, José Luís Fernández Celis, asegurou que “hai unha evolución desfavorábel no mes do desemprego para os homes, nos que se elevan as cifras en 0,03% polo aumento do desemprego na construción e na industria, sectores tradicionalmente máis masculinizados”. Porén, lembrou que “en termos estruturais, as mulleres seguen a representar nada menos que 57.75% do total de desemprego na Galiza”. Fernández Celis avanzou sobre o desemprego que “hai un aumento considerábel na construción de 1,22%, na industria de 1,17% e no sector primario con 0,53% de aumento”. Ao tempo, destacou unha “caída do paro de 1,75% nos servizos e de 2,64% no colectivo sen emprego anterior”, vinculado a que “o Nadal xera emprego nos servizos”. O dirixente da UXT valorou positivamente as cifras da contratación indefinida, que representaron no mes de decembro o 26,63% do total, pero significou que “é aínda 10 puntos máis baixa que no Estado, onde alcanza o 37,14% do total de contratos”. A secretaria de Emprego de Comisións Obreiras (CCOO), Maica Bouza, destacou que “os datos publicados evidencian un bo funcionamento do emprego no ano 2023, aínda que peor na Galiza que no conxunto do Estado”. Nesta orientación, aseverou que “o desemprego redúcese menos que no Estado e a afiliación medra menos”. Bouza reflexionou que “se unha mesma lexislación común ao Estado ofrece unha evolución diferente dos indicadores laborais, a explicación haberá que buscala nas eivas da nosa estrutura produtiva e nas políticas, ou na súa ausencia, aplicadas no ámbito autonómico”. A responsábel de Comisións Obreiras denunciou “a fenda de xénero que sofren as traballadoras galegas, que ten moito que ver coas actividades e as condicións en que desenvolven o seu traballo”. Neste sentido, Bouza exixiu “un maior compromiso tanto das empresas como da Administración autonómica para mudar neste novo ano a situación laboral das mulleres galegas”. 77.000 ocupados menos que no ano 2009 A Galiza rematou 2023 con 77.720 persoas ocupadas menos que en 2009. Neste sentido, os datos de afiliación á Seguridade Social fornecidos na xornada de onte polo Ministerio de Inclusión, Seguridade Social e Migracións sinalan que o número de persoas cotizantes nos diversos réximes laborais ascende a 1.062.280. Precisamente, as cifras máis elevadas de inscritos rexístranse no sector servizos, a única área de actividade que xerou emprego neste último mes. As cifras de onte contrastan coas de 2009, ano da chegada do Partido Popular á Presidencia da Xunta da Galiza. Naquela, altura, a Galiza fechou a anualidade con 1,14 millóns de ocupados e ocupadas. Neste momento, 90.300 persoas desenvolvíanse no sector primario, 117.200 na construción, 183.500 na industria e 751.300 nos servizos. Os sectores de actividade menos precarizados foron os que máis emprego destruíron nestes últimos 14 anos. Só na industria perdéronse 25.500 traballos neste período (de 183.500 ocupados en decembro de 2009 a 158.000 no mesmo mes de 2023). Neste sentido, un traballo do Instituto de Estudos e Desenvolvemento da Galiza (USC), certifica a desaparición de 2.470 empresas no período e reflicte ademais unha preocupante caída na actividade industrial”.