A portavoz de Feminismos, Igualdade e Dereitos LGTBI+, Elizabeth Duval, avisou esta cuarta feira de que a Lei LGTBI galega, aprobada en 2014 por unanimidade no Parlamento, está "en perigo" se o PP volve gobernar tras o 18 de febreiro, debido a que, asegurou, "iniciou unha senda de transfobia" que é preciso "parar". Duval desprazouse hoxe, sexto día de campaña, á capital galega, onde Sumar e mais a súa candidata, Marta Lois, quixeron centrar a xornada no dereitos LGTBI, primeiro cun encontro para abordar os dereitos deste colectivo e, xa pola tarde, coa celebración do Sumar Queer Fest, nunha das noites universitarias.
Duval expresou "todo o apoio" a Lois nesta campaña e salientou que "se hai cambio na Galiza, se hai posibilidade de cambio, isto pasa pola entrada de Sumar" no Parlamento e no goberno. Neste sentido, puxo o acento no perfil de Lois e na súa "traxectoria" como "recoñecida feminista e académica feminista e investigadora brillante", tamén como responsábel no seu momento de tarefas de Igualdade en Santiago de Compostela.
Duval advertiu de que fronte a un PP que a nivel estatal "está a recortar permanentemente dereitos LGTBI" e pondo en perigo conquistas", ao respecto do que puxo como exemplo a situación de Madrid, e situou a Sumar como elemento necesario para a defensa destes dereitos. E dixo que Sumar ve "tamén o perigo da propia lei Trans e LGTBI da Galiza de 2014, no seu momento aprobada cos votos dun Partido Popular que, de súpeto, empeñouse en encomendarse a unha senda perigosa de transfobia, unha senda perigosa da LGTBIfobia que ten que ser parada".
"Esa lei é un mínimo e un mínimo consenso, pero necesitamos unha forza, Sumar, que expanda moito máis, que sexa moito máis valente e vaia máis aló", reclamou Duval, quen apuntou que son necesarias máis medidas "feministas, de protección do colectivo e de liberdades e hai que contar con Sumar para levalas a cabo".
En declaracións aos medios, a candidata, Marta Lois, tamén se referiu a esa normativa, que reclamou que ten que estar dotada de "orzamentos" para que, en palabras da escritora e integrante da promotora, Marilar Aleixandre, non quede en "papel mollado".
"Somos pioneiras", salientou Marta Lois, quen indicou que Sumar "vén para aprobar e avanzar moito máis alá dos mínimos desa lei" de 2014. "Hai que pór orzamentos. A Xunta da Galiza, o señor Rueda e o PP xamais apostaron realmente por pór orzamentos e recursos económicos, necesítase avanzar en dereitos", insistiu.
Lois referiuse ao informe do Consello da Cultura Galega no que se advirte das "carencias" que sofre este colectivo en termos de dereitos para sinalar que hai "moitas necesidades e Sumar leva no seu programa avanzar no ámbito laboral, no cultural e nas políticas da memoria". "E sobre todo, colocar a diversidade, a disidencia sexual e o dereito para existir e estar con quen nos dá a gana sexa un dereito no noso país", sentenciou.
