A portavoz nacional do BNG, Ana Pontón, achacou aos "recortes" do PP en Sanidade as vacantes de prazas Médico Interno Residente (MIR) na especialidade de Medicina de Familia e Comunitaria en Atención Primaria na Galiza, onde quedaron sen cubrir 63 das prazas ofertadas.
En declaracións aos medios no municipio lucense de Riotorto, onde visitou a XV Feira da Artesanía do Ferro, Pontón asegurou que a situación da Atención Primaria é "moi preocupante" e considera "lamentábel" que o PP "en lugar de buscar solucións busque como botar balóns fóra".
Nesta liña, a portavoz do BNG reprochou aos populares que sigan "insistindo en que a única medida que se necesita é convocar máis prazas MIR". "Insiste en que o único é convocar máis prazas MIR cando na Galiza non se cobren todas as prazas que se convocan. Na Galiza, a convocatoria ten un dos peores resultados do Estado. O PP recortou e precarizó tanto as condicións de traballo que hoxe as persoas que están a estudar Medicina non ven atractiva esa especialidade", criticou.
Neste contexto, pediu ao PP que "asuma responsabilidades", argumentando que durante os anos que os populares levan á fronte da Xunta "restou máis de 2.330 millóns á Atención Primaria".
"Iso explica que teñamos médicos que non queren acudir a estes servizos, que cada vez haxa menos profesionais en Primaria, que teñamos lista de espera ou miles de nenos sen pediatra", expuxo.
Por iso, defendeu que para "solucionar o problema" se necesita "mellorar as condicións" dos médicos de familia e "que haxa máis recursos", así como que se expoña "un novo modelo" e "acabar coa precariedade".
