O presidente da Xunta da Galiza, Alfonso Rueda, recoñeceu que as declaracións da nova conselleira do Medio Rural, María José Gómez, nas que relacionaba a intencionalidade dos incendios forestais co "ADN galego" non foron "afortunadas". "E así llo comentei a ela", dixo Rueda.
Así o admitiu o líder do Executivo galego na rolda de prensa posterior ao Consello da Xunta que, por primeira vez desde o Goberno galego de Gerardo Fernández Albor, non tivo lugar unha quinta feira, senón unha segunda feira.
"Non foron unhas declaracións afortunadas, dígoo así. E tamén llo comentei a ela", afirmou Rueda que, con todo, incidiu na "enorme intencionalidade" detrás de moitos dos incendios forestais que se rexistran na Galiza.
Ademais, "agora que se achega a tempada estival", advertiu a todos os "posíbeis incendiarios" de que "todo o peso da lei caerá sobre eles".
"Vai no ADN da Galiza"
A pasada quinta feira, a preguntas da prensa antes de participar en Compostela nun encontro de coordinación sobre a loita contra a velutina, María José Gómez sinalaba que os incendios da semana pasada son "probablemente intencionados". "Vai no ADN da Galiza", afirmou. "Están a vir uns días de seca, con nordeste, vento forte, e xa sabedes o que pasa, non?", remarcaba.
