O Xulgado do Penal número 3 da Coruña vén de condenar ao pagamento dunha multa de 1.806 euros, como autor criminalmente responsábel dun delito continuado de inxurias con publicidade, un veciño de Oza-Cesuras (comarca das Mariñas) polos comentarios que realizou a través da rede social Facebook sobre un concelleiro da localidade e os seus dous fillos.
O maxistrado, que tivo en conta a circunstancia atenuante de dilacións indebidas, indica na sentenza que se acreditou que desde o 9 de setembro de 2018 o acusado publicou "numerosas mensaxes nas que alude directamente ao denunciante —a quen se refire como 'o honorario'—, que é membro da corporación municipal de Oza-Cesuras desde 1991 e, concretamente, desde o ano 2015 primeiro tenente de alcalde algúns anos máis, sendo na actualidade concelleiro de Urbanismo". Ademais, recalca que tamén nomea os seus fillos, "todo iso co propósito de menoscabar a súa honorabilidade no desempeño das súas funcións no Concello".
Ademais da multa, impúxolle a prohibición de comunicarse e de aproximarse a menos de 100 metros da vítima, do seu domicilio, lugar de traballo ou calquera outro frecuentado por el. O xuíz tamén o condenou a indemnizar o concelleiro con mil euros, en concepto de responsabilidade civil.
Na sentenza, o xuíz explica que, aínda que é certo que consta unha crítica á actuación do edil, o que predomina no texto é "un conxunto de improperios, non só dirixidos a el, senón tamén personalizados en dous dos seus fillos". Na resolución, o titular do Xulgado do Penal número 3 da Coruña afirma que o que fai o acusado é "despacharse a gusto co concelleiro e a súa familia, acusándoo de actuar de maneira prevaricadora, de pór os medios do Concello ao servizo do seu propio negocio, de abusar do seu poder, de perseguir e acosar o acusado, de ter desatendidos os veciños do Concello, de ter outros como escravos, de prestar falso testemuño en xuízos, etc.".
Ademais, subliña que o fai "de maneira innecesariamente ofensiva, vexatoria e insultante" e con expresións que, "á marxe da súa veracidade ou inveracidade, son ofensivas ou oprobiosas e resultan impertinentes para expresar as opinións ou informacións de que se trata". Así, destaca, entre algunhas das expresións vertidas, as seguintes: "Pola cagada coñécese o animal", "vivindo do conto. Nin oficio nin beneficio, todo pá saca", "animal con roupa", "pailán honorario que non supera o graduado escolar nin un test psicolóxico", "a súa enfermidade mental xustifica o acorralamento que padezo...", etc.
O xuíz conclúe que o relato "non supera, evidentemente, os test de veracidade, necesidade e proporcionalidade e é gravemente lesivo da honra do prexudicado". A sentenza non é firme, pois contra ela cabe presentar recurso ante a Audiencia Provincial da Coruña.
