O BNG demanda a convocatoria "inmediata" do concurso de transición xusta para As Pontes após o fechamento da central

O BNG demandou a convocatoria "inmediata" do concurso de transición xusta para adxudicar os nós de evacuación das Pontes unha vez que foi autorizado por parte do Goberno o peche total da central térmica.

Nun comunicado emitido esta quinta feira, o deputado nacionalista no Parlamento galego, Ramón Fernández lembra que cada un dos catro grupos da planta teñen unha potencia neta de 350 MW, co que a capacidade de evacuación ao sistema que se vai a liberar é de 1.400 MW.

Así, pregúntase "que vai pasar" con toda esta capacidade evacuación, polo que resalta como "imprescindíbel" que se adxudiquen os nós contemplados no proceso de transición para, deste modo, "garantir a viabilidade" dos proxectos industriais ideados na zona.

Fernández cualifica de incomprensíbel que o fechamento dos catro grupos da central supoña que a capacidade de evacuación das Pontes pase a ser de "cero MW", o que interpreta como "unha discriminación evidente" en comparación co ocorrido "noutros casos de fechamentos de centrais térmicas" como o de Andorra (Teruel).

"Factor de risco"

Así mesmo, cre que supón "un factor de risco moi grave para o futuro industrial e social" das Pontes e da comarca. "Coa autorización do feche dos catro grupos xa oficial, non hai escusa para que non se aclare todo o relativo ao nó de transición das Pontes", apostilou o parlamentario.

Deste modo, incidiu en que "a transición para ser xusta debe ser real" e advirte que o concurso é "a mellor baza" para "evitar o desastre económico e social" do feche da térmica "sen alternativas industriais e laborais".