“Gardádevos da chuva vós que podedes. Castelao non ten, por agora, esa opción”. Con esta mensaxe compartía o usuario @turonio no seu perfil da rede social ‘X’ (antes Twitter) un vídeo no que se pode ver como as pingueiras caen nada máis e nada menos que sobre a sepultura de Castelao no Panteón de Galegas e Galegos Ilustres, en Compostela.
As chuvias que acompañan a borrasca Nelson volveron provocar pingueiras no inmóbel que garda tamén os restos de Rosalía de Castro, Alfredo Brañas, Ramón Cabanillas, Francisco Asorei e Domingo Fontán.
Gardádevos da chuva vós que podedes. Castelao non ten, por agora, esa opción. pic.twitter.com/270AwtDEtD
— O Andre Tschamadeurer 🛰 🇪🇺 (@turonio) March 28, 2024![Publicidade 196050]()
E é que esta situación non é ningunha novidade. O mal estado das cubertas e a ausencia de mantemento do edificio resulta na manifestación de pingueiras cada vez que chove, na existencia de humidades permanentes nas paredes do Panteón e incluso na aparición de vexetación no seu interior.
Hai pouco máis dun mes, o 23 de febreiro, a Xunta da Galiza anunciaba “actuacións de urxencia” para frear as humidades que afectan o Panteón de Galegas e Galegos Ilustres. O conselleiro de Cultura, Educación, FP e Universidades, Román Rodríguez, nunha visita ao edificio, incidía no “deber de todas e todos” para garantir a súa conservación.
Con todo, e vistas as imaxes publicadas nas redes sociais esta quinta feira, 28 de marzo, este “anuncio” do Executivo galego aínda non se efectuou.
Na actualidade está a se desenvolver a Lei 5/2023, do 4 de agosto, do Panteón de Galegas e Galegos Ilustres, aprobada por unanimidade no Parlamento da Galiza co respaldo de diferentes institucións e entidades, na que se contempla a creación da Fundación Panteón de Galegas e Galegos Ilustres.
O paso das borrascas pola Galiza urxe a creación desta entidade (que estará presidida polo Parlamento e que contará coa participación da Xunta, do Concello e da Arquidiocese) para frear o deterioro deste espazo, símbolo nacional da Galiza.
