A Consellaría de Sanidade confirma este sábado un "aumento da incidencia" da tosferina, unha enfermidade de declaración obrigatoria, aínda que puntualiza que "non é exclusivo" da área sanitaria de Ferrol, senón que se dá "de forma xeneralizada" en todo o país.
Desta forma, fontes do departamento explican que o número de casos desta enfermidade, de igual forma que ocorre noutras partes do Estado español, incrementouse "no último ano" a respecto dos anteriores.
"Malia que aínda non se estabeleceron as causas do aumento, pode estar a ter impacto unha maior realización das probas de diagnose", sinalan desde a Consellaría. Con todo, remarcan que "non se aprecia" aumento de gravidade no tramo de idade máis vulnerábel —menores dun ano— e aseguran que realizan vixilancia epidemiolóxica desta enfermidade, así como que están a adoptar "as medidas pertinentes".
