Arredores, novos aires desde a Costa da Morte

Poucas cousas me dan tanta felicidade como escoitar xente nova que, desde a Costa da Morte, fai música, compón e loita para dar a coñecer a súa terra e o seu xeito de estar no mundo. Se mirades o mapa galego de festivais e salas de concertos, veredes que na Costa da Morte escasean este tipo de eventos e iniciativas musicais, así que desde aquí moita forza a todas esas persoas que mantedes a música viva e auténtica e que loitades por crear unha escena propia. Hoxe traio a música de Arredores, quinteto composto por mozas e mozos de diferentes recunchos e que está formado por Icía Varela (Cerqueda, Malpica), Andrés Rodríguez, Lucas Rama, Brian Rodríguez e Ismael Marcos. Xuntos acaban de facer o seu debut no panorama discográfico con Ecdise, un álbum que representa tanto a súa orixe como a súa evolución creando unha proposta fresca e innovadora dentro do mundo da música tradicional galega. O título do álbum fai referencia ao proceso polo cal os insectos mudan o seu exoesqueleto para medrar. Arredores toma esa metáfora para describirse como un grupo en constante cambio, que nunca deixa de medrar nin de reinventarse, pero sempre cun pé na tradición. Con este espírito, a súa música é unha extensión do que son como grupo: auténticos, creativos e profundamente conectados coas súas raíces. Musicalmente, Arredores presenta unha proposta que mestura o tradicional co novo, unha fórmula que lles permitiu facerse un oco na escena da música galega. O seu primeiro disco inclúe temas como "Fibra en vea" e "Maneo de Mens", que xa adiantaran en plataformas dixitais, xunto a outras composicións como "Bailando co mar", "Plenilunio", "Limiñoa" e "Muiñeira Vella". Cada unha destas pezas é unha homenaxe ás terras que os viron medrar, con referencias explícitas a lugares como Cerqueda ou Ortigueira. Ecdise é unha homenaxe musical a Galicia, coa voz de Icía Varela como protagonista, respaldada polo talento instrumental do resto da banda. O que distingue Arredores é a súa capacidade para manter viva a tradición, pero cun enfoque moderno. Non teñen medo de xogar coas formas, e esa experimentación nótase na diversidade do seu repertorio, que abarca dende as muiñeiras ata composicións máis contemporáneas. Pero a pesar desta innovación, nunca perden de vista a súa esencia: o amor pola música da súa terra e a intención de compartila dunha maneira accesible e emocionante para as novas xeracións. Este álbum é só o principio do que promete ser un longo camiño cheo de sorpresas. Longa vida a Arredores, un grupo que non só reinterpreta a música tradicional, senón que é un colectivo que se atreve a reimaxinala, adaptala e facela súa.