O Goberno de Compostela "non renunciará" á compra do edificio de Mazarelos para destinalo a aluguer social
A portavoz do Goberno municipal de Santiago de Compostela, Míriam Louzao, asegurou nunha rolda de prensa que "non renunciarán" á compra do edificio na praza de Mazarelos que o consistorio quere destinar a aluguer social, despois de que esta cuarta feira o BNG e Compostela Aberta aceptasen no pleno municipal unha emenda do PSOE para matizar que a compra sería con carácter xenérico no centro histórico.
Ante as preguntas dos medios de comunicación, a voceira e concelleira no Goberno de Compostela de Capital Cultural, Turismo, Educación e Memoria Histórica confirmou que non abandonarán este proceso e tentarán adquirir o inmóbel, a pesar da emenda presentada polo grupo socialista.
Ademais, apuntou que este inmóbel "debería estar en mans do Concello", e por iso, reservaron cos remanentes a "cantidade necesaria" para, en caso de ser posíbel, levar a cabo a compra. En concreto, hai 425.000 euros consignados, unha cantidade que reservaron tras saber que o edificio estaba á venda.
Segundo explicou, o que fixeron foi reservar a cantidade, traballar para conseguir a adquisición, esperar para lograla, e así, pór ao dispor da cidadanía vivendas no centro histórico da cidade. Con todo, subliñou que o Goberno municipal ten uns remanentes "realistas e responsábeis" e que está a traballar para facer realidade esta posibilidade.
"Consecuencias positivas" da ordenanza VUT
Por outra parte, Louzao mostrouse satisfeita co resultado dalgunhas medidas incluídas na ordenanza das Vivendas de Uso Turístico (VUT) en Compostela. Nesta liña, apuntou que o Concello "entende que si" que están a dar resultado.
Ante as preguntas dos medios, a portavoz do Goberno municipal de Compostela comentou que durante estes días publicáronse datos que indican que "está aumentado" o número de vivendas que se están poñendo "a disposición" da cidadanía, tamén para aluguer.
Por tanto, destacou que, aínda que entende que se empezan a notar os efectos, aínda é "cedo" para poder facer valoracións e hai que "darlle un pouco máis de tempo". Con todo, Míriam Louzao terminou a súa intervención poñendo o foco nas medidas que puxeron en marcha para "solucionar" esta cuestión e resaltou que os datos avalan as "consecuencias positivas".