'Nós Diario' entrevista os candidatos ao Congreso por Pontevedra
Nesta campaña electoral de cara ás eleccións estatais do 23 de xullo, 'Nós Diario' achega unha serie de entrevistas aos principais candidatos e candidatas ao Congreso e ao Senado polas catro circunscricións galegas para coñecer os seus programas e propostas. Hoxe é a quenda dos cabezas de lista ao Congreso pola circunscrición de Pontevedra, que son Pedro Pui (PP), Carme da Silva (BNG), David Regades (PSOE) e Verónica Martínez (Sumar).
A cidadanía dos concellos pertencentes á circunscrición de Pontevedra, ao igual que o resto da cidadanía galega, ten unha cita coas urnas o vindeiro 23-X. Nas anteriores eleccións estatais dos sete escanos que se reparten neste territorio tres foron obtidos polo PP, outros tres polo PSOE e un Podemos-EU.
Co obxectivo de coñecer de primeira man os programas e propostas das principais candidaturas, Nós Diario contacta coas persoas que encabezan as candidaturas dos principais partidos de cara ao 23-X.
Pedro Pui (PP): "O PP pactou con Vox onde a votación supuxo unha vontade clara de cambio"
O até agora portavoz parlamentario do PP no Parlamento galego, Pedro Pui, aceptou a encomenda de encabezar as listas dos populares á Cámara Baixa pola circunscrición de Pontevedra. Na entrevista, Pui analiza, entre outras cuestións, os pactos do seu partido coa extrema dereita.
“O PP, onde puido chegar a acordos con forzas máis próximas ideoloxicamente, fixo pactos, coma en Cantabria ou Canarias, e veremos como remata en Aragón. Pactou con Vox onde a votación supuxo unha vontade clara de cambio e non houbo alternativa para garantir a gobernabilidade”, manifestou Pui.
Carme da Silva (BNG): "Temos dous piares: defender os intereses da Galiza e frear os recortes de dereitos"
Da Silva forma parte do equipo de goberno da cidade de Pontevedra e tamén da Executiva nacional do BNG. Nas eleccións estatais de 2019 xa encabezou a lista dos nacionalistas ao Congreso por Pontevedra, encomenda que repite en 2023.
“Nas pasadas xerais tivemos o respaldo da sociedade galega para lograr representación no Congreso, cun traballo extraordinario de Néstor Rego. Neste momento o BNG vén dunhas municipais como a forza política que máis subiu”, indica da Silva.
David Regades (PSOE): "Nas eleccións están en xogo os dereitos sociais e das mulleres e a diversidade"
Ocupa a Secretaría do PSOE en Pontevedra e encabeza a lista ao Congreso por esa circunscrición. O vigués David Regades analiza na súa entrevista todo aquilo que está en xogo o vindeiro 23 de xullo.
“O único que defende Galiza é o PSdeG. Cando Ana Pastor foi ministra, o investimento en Pontevedra foi cero. Paralizou a estación de Vigo, o AVE, as infraestruturas terrestres”, salienta Regades
Verónica Martínez (Sumar): "O sistema de financiamento non é xusto para a Galiza, hai que mudalo"
Até xuño deste ano era directora xeral de Traballo do Ministerio de Traballo e Economía Social do que é titular a líder de Sumar, Yolanda Díaz. A asturiana Verónica Martínez comenta na entrevista as propostas da súa coalición de cara aos comicios estatais
“Nós saímos a gañar o país, ese é o escenario. Estamos convencidas de que podemos ter un Goberno progresista. O noso programa ten como base o feito para continuar polo camiño marcado e ampliar dereitos”, asevera Martínez.