Óscar Puente comparece no Congreso para informar dos problemas da rede ferroviaria
O ministro enfróntase a peticións de dimisión por parte da oposición e de socios do Goberno como ERC
O ministro de Transportes e Mobilidade Sostíbel, Óscar Puente, comparecerá esta quinta feira no Congreso dos Deputados para informar dos incidentes e problemas que ocorreron nos servizos ferroviarios durante este verán. Aínda que o PP rexistrou unha solicitude de comparecencia de Puente nun pleno extraordinario, a comparecencia finalmente será na Comisión de Transportes a petición do ministro, segundo consta na orde do día da comisión, unha semana despois de que o ministro acudira á mesma comisión do Senado polo mesmo motivo.
Na comisión, o titular de Transportes atoparase fronte a varios grupos que nos últimos días mostráronse críticos coa súa xestión á fronte da rede ferroviaria. De feito, ERC chegou a pedir na terza feira a súa dimisión, mentres que Junts alegou que en Catalunya estaban "fartos" pola xestión do tren de proximidade, o PP cualificou de "trileiro" ao ministro e até Sumar recomendou a Puente "chiar menos" e centrarse máis no que pasa cos trens.
No caso do PP, as protestas proceden polas avarías, os atrasos ou os sucesos acontecidos o pasado 5 de agosto na estación de Chamartín, en Madrid, onde se viron escenas de usuarios rompendo as ventás de trens parados polas altas temperaturas.
No que respecta a Junts, a formación denuncia o déficit de investimentos na rede ferroviaria catalana e bota en falta que se complete o traspaso completo do servizo de proximidade a Catalunya. Pola súa banda, ERC vai máis aló e pide a dimisión de Puente pola súa "ignorancia" sobre os problemas ferroviarios en Catalunya, que a xuízo da formación débense a que as cifras de execución orzamentaria son "vergoñentas" en comparación con Madrid.
Desde o BNG piden, ante a constatación de que os problemas na rede ferroviaria van continuar, un Plan de incidencias e de transporte alternativo "para evitar que as usuarias e os usuarios do tren padezan horas de agarda en vías, en tres abarrotados ou en estacións, como está a acontecer este mes de agosto cos atrasos nos servizos Vigo-Madrid ou Madrid-Ferrol".
Puente pediu perdón ás usuarias
Óscar Puente aproveitou a comparecencia da semana pasada no Senado para pedir desculpas ás persoas usuarias dos trens afectados por parte do Ministerio, de Renfe e de Adif ante un verán que cualificou de "moi complicado". "Quero comezar pedindo desculpas aos usuarios do noso sistema ferroviario que se viron afectados polas incidencias acontecidas nos últimos días", dixo o ministro ao comezo da súa intervención na Cámara Alta. A continuación, Puente comprometeuse a traballar "para prestar o mellor servizo de transporte ferroviario" aos pasaxeiros.
Iso si, o ministro incidiu en que, a pesar das carencias e deficiencias do sistema ferroviario, ao seu xuízo "nunca houbo un mellor servizo ferroviario que o que se presta en España neste momento".