Renfe puxo esta sexta feira á venda os billetes para viaxar nos novos servizos Avlo da Galiza e Asturias a Madrid, que comezarán a prestar servizo desde o próximo 22 de xullo, cunha campaña de prezos que van desde os 7 euros, para viaxar até o 30 de setembro. Estes servizos prestaranse cos novos trens S106 de Renfe de rodaxe desprazábel e con 581 prazas, segundo informou a compañía en nota de prensa.
Na Galiza, a nova oferta comercial supón a implantación dun servizo Avlo diario de ida e volta, que alternará as súas orixes e destinos entre Vigo-Madrid e A Coruña-Madrid, con paso por Santiago de Compostela e con paradas en todas as estacións da liña: Segovia, Medina del Campo, Zamora, Sanabria AV, A Gudiña, Ourense, Vilagarcía de Arousa e Pontevedra.
En sentido Madrid-Galiza, haberá un Avlo con saída ás 17.08 horas con destino A Coruña as segundas, cuartas e sextas feiras e mais os sábados, con chegada ás 21.04 horas. E con destino Vigo-Urzaiz haberá as terzas e quintas feiras e os domingos, con chegada ás 21.37 horas.
Pola súa parte, no sentido Galiza-Madrid, o Avlo con orixe A Coruña sairá ás 6.34 horas as terzas e quintas feiras e os sábados e domingos, e con orixe Vigo as segundas, cuartas e sextas ás 5.57 horas, con saída desde Santiago ás 7.06 horas e chegada a destino ás 10.32 horas.
O resto da oferta comercial entre Galiza e Madrid mantén as súas frecuencias actuais, aínda que con algunha modificación horaria en tres trens: Madrid 18.25-Ferrol 0.04, A Coruña 19.30-Madrid 23.03 e Madrid 20.23-Ourense 22.37.