Orzamentos galegos

“Orzamentos sen ambición de país e desilusionantes”, así os ve Ana Pontón, en tanto que Luís Villares os cualifica de “propaganda” e de “retorno á austeridade”. Leiceaga, por súa parte, critica que o Goberno Feijóo non esgote a capacidade de gasto pactada polo seu partido en Madrid co PP, no Consello de Política Fiscal e Financeira.

Como estaba previsto, o goberno galego aprobou esta sexta feira o proxecto de orzamentos cunha hipótese de déficit do 0,5 por cento. Isto é, a Xunta non utiliza a décima a maiores que aprobou esta quinta feira o Consello de Política Fiscal e Financeira, após o acordo PP-PSOE. Iso significa que en principio renuncia a gastar 60 millóns de euros, o que resta forza á tese oficial de que estamos ante uns orzamentos expansivos.

O Consello da Xunta deu esta sexta feira o visto bo a unhas contas que se incrementan nun 2,9% a respecto do presente.