Os responsábeis de Altri levaron a cabo unha nova viaxe ás súas plantas de Portugal ao que estiveron convidados diversos medios de comunicación. Durante o mesmo, ao que asistiu Europa Press, defenderon a "sustentabilidade" do proxecto.
O conselleiro delegado de Altri, José Soares de Pina, e o responsábel do proxecto Gama (nome que recibe a fábrica de Palas de Rei, na Ulloa), Bruno Dapena, trataron de explicar a súa versión de como será e que suporá para a Galiza a planta que prevén pór en marcha.
Neste sentido, destacaron a importancia que ten para esta compañía instalarse alí onde está a madeira para evitar as emisións que supón o transporte, en referencia ás grandes masas de eucalipto existentes na Galiza, especie que empregan nos seus procesos.
Todo para fabricar dous produtos distintos. O primeiro, fibras de celulosa a partir de madeira de eucalipto. O segundo é o chamado lyocell, un fibra téxtil producida a partir das fibras solúbeis anteriores que pretende ser substituto do algodón.
Altri tamén mostrou outra parte dos seus procesos industriais, onde empeza todo, o viveiro de árbores. Alí xera entre 6 e 8 millóns de árbores ao ano, na súa gran maioría eucaliptos que son tratados xeneticamente para aumentar a súa produtividade.
A través de estudos, utilizan certos tipos de eucaliptos nunhas ou outras zonas dependendo de como se adapten a factores como a seca ou o frío. Desta maneira, plantan en cada lugar a especie que mellor rendemento terá.
Finalmente, puxeron o foco na necesidade de que 25% do valor do investimento para desenvolver a factoría que pretenden instalar na Galiza proveña de subvencións das Administracións do Estado español.
Sobre este tema, dixeron que xa tiveron varios encontros, sobre todo co Goberno estatal, para conseguir uns 250 millóns para a construción da factoría na Ulloa, provenientes principalmente de fondos europeos. "Nestes momentos son optimista", indicou o conselleiro delegado. A pesar de todo, desde Altri recoñecen que sen as axudas, o proxecto non sairía adiante.
