Os novos contratos de recollida do leite rebaixan o prezo até 5 céntimos por litro: "Todas as empresas xogan á baixa"

As ofertas iniciais na renovación de contratos do leite que se realizaron esta segunda feira provocaron as queixas das explotacións gandeiras galegas. As organizacións sindicais e gandarías consultadas por Nós Diario verifican unha baixada xeneralizada dos prezos que vai dos 2 aos 5 céntimos/litro segundo as diferentes empresas que o recollen. Xa as propostas preliminares das diferentes compañías indicaban, sobre un prezo base de 40 céntimos que Entrepinares rebaixaba 4,5 céntimos/litro, Lactalis 3 céntimos/litro e Leite Río 2 céntimos/litro. Segundo recolle o sistema unificado de información do sector lácteo (Infolac) do Ministerio de Agricultura, Pesca e Alimentación (MAPA), o importe medio que se paga polo leite galego era de 0,589 euros/litro en febreiro de 2023 e foi descendendo até os 0,495 euros/litro en xaneiro de 2024, este último prezo lonxe da media estatal que estaba sitiada ese mesmo mes en 0,603 euros/litro. Do total de volume de contratos na Galiza (4.668) a baixada de abril afecta, en maior medida, aos contratos asinados por un período de 3 a 6 meses (3.464) e aos que contan con períodos inferiores aos 3 meses (585). Os primeiros, segundo a mesma fonte, recollerían un volume de leite de 167.252.628 litros (70,57%) e os segundos 46.439.373 (19,59%). Nestas cifras non estrarían os acordos cooperativos, na súa maior parte con contratos superiores ao ano. A Fruga exixe a posta en marcha da Mesa de Interlocución Láctea ante a "especulación" da industria "Todas as empresas están xogando á baixa" Un exemplo de baixada do prezo do leite é a que lle presentaron a Ana Rodríguez, gandeira de Chantada (comarca homónima) cunha explotación de 120 vacas producindo dun total de algo máis de 200. Explica a Nós Diario que o novo contrato chegoulle cunha rebaixa de 4,5 céntimos/litro, quedando nun importe base de 43 céntimos/litro. “Entramos nunha franxa de prezos que comezan a ser moi perigosas, teremos que avaliar os custos e veremos se non entramos en perdas”, asegura. Dúas familias viven da Sociedade Agraria de Transformación (SAT) que teñen desde fai 22 anos e esta gandeira recoñece que cada vez a situación é máis difícil. “En xullo eu xa quería saír despois das baixadas que tivemos e agora todas as empresas están xogando á baixa”, apunta. A culpa é de Europa “Non hai razóns obxectivas, poñen como escusa para esta redución que os prezos están máis baixos en Europa”, asegura Ana Rodríguez. Porén, o último dato dispoñíbel para o leite cru na UE correspondente ao mes de xaneiro de 2024, segundo o MAPA, é de 46,7 céntimos/litro, malia o descenso de 16,2% en comparación ao do mesmo mes do ano pasado e un incremento de 0,3% desde o mes anterior. A Fruga tamén discrepa das razóns que dá a industria do leite. “En Holanda os prezos están subindo, polo que non ten sentido que digan iso para xustificar esta nova baixada de prezos”, considera en declaracións a Nós Diario desde a Federación Rural Galega, Elías Somoza. O futuro da gandaría galega, "nas mans" do relevo xeracional Sen mudar de empresa “Volven os problemas para cambiarse de empresa, todas as que traballan na Galiza baixaron os prezos mais non todas pagan o mesmo”, recoñece Ana Rodríguez, “hai que ter en conta que só dous céntimos no litro pode significar entrar en perdas ou non”, engade. Elías Somoza opina que unha das eivas polas que non se dá solucionado este problema é “a inconsistencia xurídica da Lei da Cadea Alimentaria”. Este gandeiro e sindicalista entende que “os prezos non se colocan en función dos custos de produción, póñense en función do mercado”. E diante desta situación asegura que “a indefensión das explotacións é total”. Desde o Sindicato Labrego galego (SLG), Manuel Villaverde recoñece a Nós Diario que ante o contrato "podes asinar ou non, mesmo hai algunhas que recollen sen contrato, mais non tes moita saída pois terías que buscar outra industria e non atoparías outra cando o leite está á baixa como agora". Para Óscar Pose é "evidente" que esta lei necesita modificacións. "Non hai negociación, todo é imposición, ben sexa porque as industrias se poñen de acordo ou por outras cuestións que descoñecemos, sempre fan o mesmo movemento de prezos". Este sindicalista sinala que "sempre actúan igual, con contratos de entre tres e catro meses, polo que as explotacións teñen que renunciar aos que teñen unha duración dun ano". Planas anuncia que reforzará o control O ministro Luis Planas presentou esta segunda feira ás organizacións agrarias un documento con 43 medidas, entre elas a de reforzo da Axencia de Información e Control Alimentarios (AICA), a encargada de mellorar o funcionamento da cadea alimentaria, co obxetivo de conseguir un maior equilibrio e transparencia nas relacións comerciais ao longo da cadea alimentaria. Unións Agrarias acusa a leiteira asturiana Capsa de lanzar unha "campaña de asedio" ao sindicato A industria apela á entrada de queixos para baixar prezos Desde a industria, segundo indican sindicatos e explotacións gandeiras, outra causa para baixar o prezo do leite en orixe é a introdución de produtos lácteos desde fóra do Estado español. "Din que hai unha entrada de queixo lonxe do normal, mais coido que tampouco xustifica unha baixada deste tipo", indica Óscar Pose, "só 14% do leite no Estado español vai para queixo, e desa porcentaxe aínda é máis pequena a parte que se dedica a queixo barato", engade. Manuel Villaverde afirma que as empresas tamén sinalan ao iogur "cuns prezos baixos cando procede doutros países" como outro motivo. "Con todo a oferta aquí é moito máis pequena que a demanda polo que non é lóxica unha baixada de prezos" conclúe. Produtos caros Para desmentir esta explicación por parte das compañías, Pose indica que hai produtos que "nivelan" os beneficios. "De cada litro de leite sacan un valor importante, sobre todo en manteiga" polo que, asegura, "nin a variación de consumo, que agora se está estábel, pode ser a escusa para optar por esta medida". Para que expuxeran a súa versión sobre o tema, Nós Diario púxose en contacto coas compañías Naturleite, Leite Río e Lactalis sen recibir resposta ao feche desta edición.