O G-20 aceptará a Unión Africana esta fin de semana como membro permanente

O G-20, o foro internacional que agrupa as principais economías do planeta, concederá na súa cimeira do 9 e 10 de setembro na cidade india de Nova Deli á Unión Africana (UA) o status de membro permanente, confirmaron a quinta feira fontes da entidade rexional, que pediron non ser identificadas, á axencia Reuters. Nese sentido, un alto funcionario de Suráfrica detallou que o texto concreto aínda se estaba a discutir, e adiantou que a sexta feira poderían finalizar as negociacións. Dúas fontes gobernamentais indias ratificaron que non houbo obxeccións á súa proposta por parte dos outros membros do G-20, mais sinalaron que até o vindeiro ano non agardaban formalizar a entrada da UA, cando o Brasil asuma da India a Presidencia rotatoria do organismo. A axencia Bloomberg corroborou que se espera que a decisión sexa comunicada ao longo do cumio, así como que a UA terá o mesmo status que a Unión Europea (UE), un extremo que tamén recolle The Times of India, salientando que a medida forma parte “dunha campaña para brindar aos países africanos unha voz máis forte en temas globais”, sobre todo “a medida que os mercados emerxentes do chamado Sur Global asumen un papel máis prominente nos asuntos mundiais”. A UE é o único membro permanente do G-20 que non é un Estado, mentres que a UA até o de agora estaba considerada como unha organización convidada, a mesma categoría do Estado español no foro. Pouco antes de facerse pública a decisión da entidade, o secretario xeral da Organización das Nacións Unidas (ONU), António Guterres, sostivo que “está claro que ficaría moi feliz de ver a UA tornarse membro do G-20”, durante a súa participación na cimeira da Asociación das Nacións do Sueste Asiático (Asean). Desde Iacarta, en Indonesia, reiterou que “África está subrepresentada nas actuais estruturas internacionais”, o que explicou pola carencia de países independentes –“a maioría estaba baixo réximes coloniais”– no continente cando se deseñaron as institucións actuais, e insistiu en que “apoio fortemente a presenza dos países africanos” nestes órganos, propondo que “cando menos un” sexa “membro permanente do Consello de Seguridade da ONU”. A China, Francia, Rusia, o Reino Unido e os Estados Unidos son os cinco membros permanentes do Consello de Seguridade, o que lles outorga poder de veto sobre calquera resolución. No que atinxe á arquitectura financeira mundial, controlada polos países occidentais por medio da súa primacía nos dereitos de voto no seo do Banco Mundial ou do Fondo Monetario Internacional, a Cimeira Africana sobre o Clima, que decorreu esta semana coa presenza de máis de 20 xefes de Estado e de Goberno, demandou unha reforma urxente do sistema financeiro mundial que inclúa a reestruturación e o alivio da débeda. O propio Guterres fixo fincapé no asunto, considerando unha “necesidade” fixar un mecanismo de renegociación de débeda “para apoiar as suspensións de pago, prazos de préstamo máis longos e taxas máis baixas”. Tamén recolleu outra das reclamacións dos líderes africanos, subliñando que “os países desenvoltos deben cumprir os seus compromisos climáticos cos países en desenvolvemento”, após non entregarse os 93.000 millóns de euros anuais que prometeran a partir de 2020. A este respecto, o primeiro ministro indio, Narendra Modi, fixo énfase a quinta feira en que é preciso abordar o cambio climático “cunha actitude máis construtiva centrada no que se pode facer para loitar” contra el, algo que debe ir da man de “accións sobre financiamento climático e transferencia de tecnoloxía”, apuntando que “a tecnoloxía é transformadora, pero tamén debe ser inclusiva”. Por iso, e 24 horas despois de confirmarse que o verán boreal deste ano foi a estación máis calorosa desde que existen rexistros a nivel mundial, Modi pediu o apoio do G-20 para impulsar o desenvolvemento do Sur Global, “e a acción climática debe ser unha pescuda complementaria”, subliñou o mandatario. Malia que a arquitectura financeira mundial e a loita contra o quecemento global, xunto á seguridade alimentaria e enerxética, serán os temas centrais da cimeira na India a fin de semana, tamén xurdiron nas últimas xornadas distintas propostas, e, mentres a xuntanza climática en África propuxo un “imposto ao carbono sobre o comercio de combustíbeis fósiles, o transporte marítimo e a aviación”, un grupo de case tres centenares de economistas –como Joseph Stiglitz ou Thomas Piketty–, millonarios ou políticos, entre eles o estadounidense Bernie Sanders, solicitou ao G-20 que impulse un acordo internacional para aumentar os impostos sobre o patrimonio das persoas con máis riqueza económica. Facendo un chamamento a actuar antes de que a riqueza extrema “acabe por corroer o noso futuro colectivo”, alertan de “niveis perigosos de desigualdade”. “É hora de que os Gobernos actúen”, defende Katy Chakrabortty, directora de políticas de Oxfam, que puxo o foco no apoio xeneralizado a “unha tributación máis xusta para tratar o custo da vida e as crises climáticas”. Perspectivas Na reunión, que contará con case 40 líderes de Estados e organizacións internacionais mais na que non estarán nin o presidente ruso, Vladimir Putin, nin o chinés, Xi Jinping, nunha ausencia que Beijing e Nova Deli minimizaron, “agárdase pouco” polas “profundas divisións entre os membros do G-20”, indica o xornal The Guardian, que expón desde a guerra en Ucraína, na que só os países da contorna da Organización do Tratado do Atlántico Norte aplicaron sancións coercitivas a Moscova, até a disputa fronteiriza sino-india. Asemade, remarca que o G-20 “foi creado para xestionar a globalización, pero a globalización está en retirada”. Aínda que a India “quixo presentarse como o convocador do mundo nun momento de fragmentación internacional”, asinar pactos de amplo espectro “será máis difícil se Xi non está alí”, mantén á axencia AP Josh Lipsky, director do Centro de Xeoeconomía do Atlantic Council. Rachel Ziemba, investigadora do Centro para unha Nova Seguridade Estadounidense, reafirma a dificultade de que se logren acordos relevantes pola situación actual, e delimitou as posibilidades ao apoio “á importancia de conseguir que a enerxía e os alimentos flúan, e outras cuestións de seguridade alimentaria para as nacións en desenvolvemento”. Debate pola denominación da India Os convites para unha cea enviados esta semana ás persoas que participarán no G-20 foron asinados por Droupadi Murmu, titular da Presidencia india, como “presidenta de Bharat”, desatando as especulacións sobre un hipotético cambio na denominación do país. Ambos os dous son oficiais, mais identifícase India como a nomenclatura en inglés e Bharat en hindi. O Partido Popular de Modi alimentou o debate ao referirse a el como "primeiro ministro de Bharat".