México denunciará o Ecuador perante a Corte Internacional de Xustiza logo do asalto á súa embaixada

México prevía presentar a segunda feira unha denuncia na Corte Internacional de Xustiza (CIX), o órgano xudicial principal da Organización das Nacións Unidas (ONU), contra o Ecuador, nun caso que confían en gañar “rapidamente” e que as e os maxistrados sentencien o Estado ecuatoriano “a reparar o dano”, detallou a titular de Exteriores mexicana, Alicia Bárcena. A demanda foi anunciada horas antes na recepción dos diplomáticos mexicanos que abandonaron o Ecuador após a ruptura de relacións diplomáticas determinada polo Executivo mexicano en resposta ao asalto na noite da sexta feira por parte das forzas de seguridade ecuatorianas da embaixada de México en Quito, que supón unha violación da Convención de Viena de 1961, que determina a “inviolabilidade” das sedes diplomáticas, co fin de arrestar Jorge Glas, vicepresidente do Ecuador entre 2013 e 2018 baixo a Presidencia do progresista Rafael Correa (2007-2017), e brevemente na de Lenín Moreno (2017-2021). México acababa de outorgarlle asilo político. O acto “case sen precedentes”, destaca a axencia AP, pon en perigo “todas as embaixadas de todos os Estados do mundo”, pois “entramos” na “lei da xungla”, explica Natalia Saltalamacchia, docente de Relacións Internacionais no Instituto Tecnolóxico Autónomo de México, poucos días despois de que Israel bombardeara o consulado de Irán en Damasco, a capital siria. Irán sopesa a resposta a Israel entre o temor a unha guerra cos Estados Unidos Porén, amais de infrinxir a inviolabilidade da embaixada, a intervención do Executivo ecuatoriano liderado polo conservador Daniel Noboa tamén violou outro apartado do entendemento internacional ao ferir o persoal diplomático, como amosou Roberto Canseco, que encabezou de forma efémera a legación diplomática logo de que o Ecuador designara como “persoa non grata” e ordenara a expulsión da embaixadora, Raquel Serur, antes do asalto e con posterioridade a que o presidente mexicano, o progresista Andrés Manuel López Obrador, vinculara a vitoria electoral de Noboa co asasinato do candidato presidencial Fernando Villavicencio. Lasso decreta o estado de excepción no Ecuador após o asasinato de Villavicencio Na rolda de prensa á chegada da misión diplomática, Canseco apareceu cun colariño por mor das agresións dos policías ecuatorianos cando trataba de impedir o asalto. Ao tempo, Serur reiterou que “o atropelo é de tal magnitude” que Noboa non é consciente da dimensión do que acaba de facer ao “nobre” pobo ecuatoriano. Condena xeneralizada contra o asalto Despois da decisión mexicana de fechar indefinidamente a súa embaixada, estabelecendo en paralelo un sistema electrónico para atender a cidadanía de México no país, os embaixadores de Alemaña, Cuba, Honduras e Panamá acompañaron a misión diplomática mexicana ao aeroporto para garantir que se respectara a súa integridade física. Aínda que Noboa aseverou que o asilo outorgado a Glas era “ilícito”, argüíndo o “abuso das inmunidades e privilexios” diplomáticos por parte de México, o asalto á embaixada foi condenado polo Brasil, Colombia, Venezuela, Chile, a Arxentina, o Uruguai, Cuba, os Estados Unidos, a Unión Europea, o Reino Unido ou a ONU. Até o de agora ningún Estado, nin sequera os máis próximos ao gobernante aliñado con Washington, apoiaron a acción. Amais, Nicaragua resolveu rachar relacións co Ecuador en solidariedade con México. A defensa legal de Glas advertiu que a súa vida corre perigo no país, e o ex presidente Correa asegurou que “destruíron a figura do asilo” e acusou Noboa de actuar por “egocentrismo”, xusto no medio dunha polémica pola súa presenza na Feira Internacional de Turismo (Fitur) de Madrid en xaneiro, na que usou a despregadura oficial de seguridade para actividades privadas e foi captado lanzando billetes ao aire mentres pedía que o levasen de festa, o que causou que o Gabinete español demandara explicacións. O seu pai, o tamén conservador Álvaro Noboa, é un empresario dedicado á industria agroalimentaria e a persoa máis rica do país, e fracasou en até cinco ocasións na súa tentativa de alcanzar a Presidencia, tres delas contra Correa. Dispárase a violencia no Ecuador: "Estamos nun estado de guerra" A segunda hipótese do ex mandatario sobre o acontecido é un intento de Noboa de reforzar a súa posición de cara a un referendo que el mesmo impulsou, no que se votarán distintas reformas o 21 de abril, entre elas ampliar as prerrogativas sobre o uso dos militares para tarefas de seguridade, estabelecer que sexan comités de arbitraxe internacionais os que decidan sobre controversias en materia de investimentos para favorecer as empresas estranxeiras, permitir a extradición de nacionais ou legalizar os contratos por horas. Noboa perde o lexislativo O certo é que o asalto acabou con calquera posibilidade de gobernabilidade para Noboa, ao que o principal grupo da Asemblea Nacional, a Revolución Cidadá de Correa, permitira aprobar varias normas e ofrecera diálogo para avanzar en asuntos chave. A formación declarouse en oposición ao seu Goberno criticando o “modelo autoritario e ditatorial” de Noboa, e a ex candidata presidencial Luisa González exixiulle que renuncie. Á vez, a formación rexistrou unha solicitude para lanzar un xuízo político no lexislativo contra Mónica Palencia, a ministra do Interior, e Gabriela Sommerfeld, responsábel de Relacións Exteriores, para brindar “respostas ao país ante a vergonza internacional” que provocaron. Acusacións de 'lawfare' polos xuízos contra Rafael Correa e Jorge Glas Como o propio Correa, que recibiu asilo en Bélxica, Jorge Glas tamén foi condenado a oito anos de prisión por supostos subornos -e no seu caso amais asociación ilícita- que involucraría empresas ecuatorianas e internacionais. Non obstante, tanto a súa formación como Gobernos progresistas da rexión atribúenas a un caso de lawfare, o uso do sistema xudicial para perseguir opoñentes políticos, e a Comisión Interamericana de Dereitos Humanos emitiu en 2019 medidas provisorias para “protexer os dereitos á vida e a integridade persoal” de Glas, unha reclamación que replicou a ONU. Após o asalto á embaixada, Correa subliñou que Glas foi "golpeado". O organismo internacional tamén cuestionou un ano despois que o Executivo ecuatoriano, dominado polos conservadores desde a fin do mandato de Correa, se negaba a aplicar unha orde xudicial para que Glas saíse de prisión, que finalmente acatou, antes de que a finais do pasado ano se lle citara para declarar noutro caso de corrupción, o que motivou que se refuxiara na embaixada mexicana. Sexa como for, distintos indicios apuntan a que se trata dun caso de lawfare, como que Diego Javier Moscoso e Rubén Molina, xuíces que resolveron a favor de Glas, foran sancionados pola xudicatura. Na persecución a Correa, unha filtración revelou que o xuíz Iván Saquicela se dispuña a anular a súa condena. Con todo, tras ratificala foi nomeado presidente da Corte Nacional, o máximo tribunal do país. Ao respecto, a Interpol rexeitou emitir unha orde internacional de captura ao tratarse dunha persecución política.